بھارت ہک ٻئے ‘فالس فلیگ آپریشن’ دی تیاری کریندا پئے، ایں واری ساݙا ولدا پہلے توں وی تکڑا ہوسی، لیفٹیننٹ جنرل احمد شریف چوہدری

راولپنڈی۔ 3 نومبر(اے پی پی)پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو بھارت گہرے سمندر اچ ہک ٻیا ‘فالس فلیگ آپریشن’ دی تیاری کریندا پئےے، بھارت ڄاݨ ڳھنے ایں واری جواب پہلے توں ودھ شدید ہوسی، افغان طالبان، ‘فتنہ الخوارج’ دے دہشت گرداں کوں حفاظتی حصار ݙیوݨ کیتے گھاٹی آبادی آلے علاقیاں اچ وسا ڳئن، پاکستان دا ہک نقطے دا ایجنڈا اے جو افغان سرزمین ساݙے خلاف استعمال نہ تھیوے۔ سوموار کوں صحافیاں نال غیر رسمی گالھ مہاڑ کریندے اُنہاں آکھیا جو غزہ امن فوج دا فیصلہ حکومت اتے پارلیمنٹ کریسی، پاکستان اپݨیاں سرحداں، عوام دی حفاظت کیتے تیار اے، پاکستان پالیسی بݨاوݨ اچ خودمختار اے۔ اُنہاں آکھیا جو بھارت گہرے سمندر اچ ہک ٻیا ‘فالس فلیگ آپریشن’ دی تیاری کریندا پئے۔ بھارت زمین، سمندر اتے ہوا اچ جو کجھ کرݨے، کرے، بھارت ڄاݨ ڳھنے ایں واری جواب پہلے توں ودھ شدید ہوسی۔ اُنہاں آکھیا جو افغانستان دیاں شرطاں معنی نئیں رکھدیاں، دہشت گردی دا خاتمہ اہم اے۔ اُنہاں آکھیا جو جرائم پیشہ اتے دہشت گرد گروپ ملک اچ جرائم، اسمگلنگ کوں روکݨ اچ رکاوٹ ہن۔ افغانستان اچ منشیات اسمگلراں دی افغان سیاست اچ مداخلت اے۔ افغانستان توں وݙے پیمانے تے منشیات پاکستان اسمگل کیتی ویندی پئی اے۔ اُنہاں آکھیا جو دہشت گرد عُشر دے ناں تے ٹیکس گھندن۔ اُنہاں آکھیا جو ‘فتنہ الخوارج’ دے خلاف آپریشن اچ 1667 دہشت گرد مارے ڳئے، ایں سال 62 ہزار 113 آپریشنز کیتے ڳئے، 582 فوجی جوان شہید تھئے، ودھیرے آپریشنز بلوچستان اچ تھئن۔ حالیہ پاک افغان کشیدگی دے دوران 206 افغان طالبان مارے ڳئے، حالیہ پاک افغان کشیدگی دے دوران 112 ‘فتنہ الخوارج’ ہلاک تھئے ہن۔ ٹی ٹی پی افغان طالبان دے امیر دے ناں تے بیعت کیتی، ٹی ٹی پی افغان طالبان دی ہک شاخ اے۔ ڈی جی آئی ایس پی آر آکھیا جو افغان طالبان، ‘فتنہ الخوارج’ دے دہشت گرداں کوں حفاظتی حصار ݙیوݨ کیتے گھݨی آبادی آلے علاقیاں اچ وسا ڳئن۔ اُنہاں آکھیا جو افغانستان اچ ساݙا جواب تیکھا اے، کوشش کیتی جو افغانستان دے نال معاملے طے تھی ونڄن۔ پاکستان دا ہک نقطے دا ایجنڈا اے، افغان سرزمین ساݙے خلاف استعمال نہ تھیوے۔ ترائے چار مہینے اچ افغانستان توں اندر آوݨ دے دوران دہشت گرداں کوں ماریا ڳیا، مارے ڳئے دہشت گرداں اچ 60 فیصد افغان باشندے شامل ہن۔ اُنہاں آکھیا جو تیراہ اچ آپریشن دی وجہ توں اِتھاں افیون دی فصل تباہ کیتی ڳئی، وادی تیراہ اچ ڈرونز، اے این ایف اتے ایف سی دے ذریعے پوست تلف کیتی ڳئی۔ خیبر پختونخوا اچ 12 ہزار ایکڑ تے پوست کاشت کیتی ڳئی اے۔ فی ایکڑ پوست تے منافع 18 لکھ توں 32 لکھ روپے ݙسایا ویندے۔ مقامی سیاستدان اتے لوک وی پوست دی کاشت اچ ملوث ہن۔ افغان طالبان ایں کیتے اُنہاں کوں تحفظ ݙیندن جو اے پوست افغانستان ویندی اے، افغانستان اچ پوست توں آئس اتے ٻیجی منشیات بݨائی ویندی اے۔ اُنہاں آکھیا جو فوج سیاست اچ نئیں اُلجھݨ چاھیندی، فوج کوں سیاست توں پرے رکھیا ونڄے۔ گورنر راج بارے فیصلے دا اختیار حکومت کولو اے۔ اُنہاں آکھیا جو مدرسیاں دی تعداد 2014 اچ 48 ہزار ہئی، ہݨ ہک لکھ توں ودھ اے۔