صدر مملکت آصف علی زرداری قطر دے دورے تے دوحہ پُج گئے

دوحہ۔4نومبر  (اے پی پی):صدر مملکت آصف علی زرداری ہک ݙینھ دے سرکاری دورے تے قطر دے دارالحکومت دوحہ پُج ڳئے۔ حماد انٹرنیشنل ایئرپورٹ تے صدر مملکت تے انہاں دے وفد دا استقبال سینئر قطری عہدے داراں تے پاکستان دے سفیر دوحہ کیتا۔ انہاں صدر مملکت کوں پُھل ہار پیش کیتے۔ ایوانِ صدر دے پریس ونگ دے مطابق، دورے دے دوران صدر آصف علی زرداری عالمی سماجی ترقیاتی کانفرنس اچ شرکت کریسِن۔ اپݨے کلیدی خطاب اچ صدر مملکت عالمی برادری کوں سماجی ترقی تے جامع معاشی وادھے دے حوالے نال پاکستان دے اقدامات توں آگاہ کریسِن۔ صدر آصف علی زرداری سماجی تحفظ، غربت اچ کمی تے کمزور طبقیاں کوں مضبوط کرݨ اچ “بینظیر انکم سپورٹ پروگرام” دے کردار تے روشنی پیسن۔ صدر مملکت “دوحہ الائنس فار سوشل پروٹیکشن اینڈ جابز کمپیکٹ” دے آغاز کیتے پاکستان دے اقدامات تے عالمی ترقیاتی وعدیاں نال ہم آہنگ منصوبیاں تے ڳالھ مہاڑ کریسِن۔ صدر مملکت سماجی تے ماحولیاتی تبدیلیاں کیتے مالی وسائل دے حصول، ایس ڈی جی اسٹیمولس تے ٻئے عالمی اقدامات دی اہمیت تے زور ݙیسِن۔ صدر آصف علی زرداری آپݨے دورے دے دوران مختلف عالمی تے علاقائی رہنماواں تے بین الاقوامی تنظیماں دے نمائندیاں نال ملاقاتاں وی کریسِن۔