صدر مملکت آصف علی زرداری نال عراق دے صدر ڈاکٹر عبد اللطیف جمال رشید دی ملاقات

دوحہ/اسلام آباد (4 نومبر) صدر مملکت آصف علی زرداری نال قطر دے دارالحکومت دوحہ وچ سماجی ترقی کیتے ݙوجھے عالمی سربراہی اجلاس دے موقع تے جمہوریہ عراق دے صدر ڈاکٹر عبد اللطیف جمال رشید دی ملاقات تھئی۔ ایوان صدر دے پریس ونگ موجب، ݙوہیں رہنماواں پاکستان تے عراق وچال تعلقات دے سارے پہلواں دا جائزہ ڳھدا تے ݙوہیں ملکاں وچال پراݨے برادرانہ تعلقات کوں مزید مضبوط بݨاوݨ کیتے آپݨا سانجھا عزم دوہرائے ۔تجارت تے سرمایہ کاری تے ڳالھ کریندے ݙوہیں رہنماواں کاروباری رابطیں وچ ودھارا تے ویزا سہولت دے ذریعے اقتصادی رابطے ودھاوݨ دی اہمیت تے زور ݙتا۔ صدر آصف علی زرداری پاکستانی زائرین کوں سہولت ݙیوݨ وچ عراق دے تعاون دی تعریف کیتی تے عراق وچ پاکستانی کمیونٹی دے گرانقدر تعاون دا ذکر کیتا جیڑھا ݙوہیں ملکاں وچال خالص دوستی دے پل دے طور تے کم کریندی پئی اے۔عراقی صدر نے صدر مملکت کوں عراق دے دورے دی دعوت ݙتی۔ صدر آصف علی زرداری دعوت قبول کریندے آکھیا جو او ایں مہینے دے چھیکڑ وچ عراقی پارلیمانی انتخابات دے فوراً بعد عراق دا دورہ کریسن۔ ݙوہیں رہنماواں علاقائی امن، استحکام تے تعاون تے وی ڳالھ مہاڑ کیتی تے ݙوپاسے تعلقات اڳوں ودھاوݨ کیتے باقاعدہ اعلیٰ سطح دے رابطے برقرار رکھݨ تے اتفاق کیتا۔ملاقات وچ خاتون اول محترمہ آصفہ بھٹو زرداری، چیئرمین پیپلز پارٹی بلاول بھٹو زرداری تے قطر وچ پاکستان دے سفیر وی موجود ہن۔