صدر مملکت آصف علی زرداری نال تاجکستان دے صدر امام علی رحمان دی ملاقات

دوحہ/اسلام آباد (4 نومبر) صدر مملکت آصف علی زرداری نال تاجکستان دے صدر امام علی رحمان دی قطر دے دارالحکومت دوحہ وچ ملاقات تھئی۔ ایوان صدر دے پریس ونگ موجب ݙوہیں رہنماواں وچال ملاقات ݙوجھی عالمی سمٹ برائے سماجی ترقی دے موقع تے دوحہ وچ تھئی۔صدر مملکت آکھیا جو پاکستان تاجکستان نال تاریخی، ثقافتی تے لسانی رشتیں تے مبنی تعلقات کوں اہمیت ݙیندے۔ انہاں تجارت، سرمایہ کاری، توانائی، دفاع تے عوامی رابطیں دے شعبیں وچ ݙوطرفہ تعاون کوں مزید ودھارا ݙیوݨ دے عزم دا اعادہ کیتا ۔صدر آصف علی زرداری 2024ء وچ دستخط تھئے ‘سٹریٹجک پارٹنرشپ معاہدے’ کوں ݙوہیں مکاں دے تعلقات وچ گہرائی دا مظہر قرار ݙیندے آکھیا جو ‘CASA-1000’ منصوبے دی بحالی مشترکہ خوشحالی دے طرف ہک اہم قدم اے۔ صدر مملکت تاجکستان کوں پاکستان دے ذریعے تجارت تے رابطیں دے نویں موقع ڳولݨ تے براہ راست پروازاں دی بحالی تے غور کرݨ دی دعوت ݙتی۔انہاں اگست 2025ء وچ تھیوݨ آلی مشترکہ فوجی مشق ‘دوستی II’ دی تعریف کیتی تے دفاعی تعاون تے استعداد کار وچ معاونت دی پیشکش کیتی۔ ݙوہیں رہنماواں خطے تے عالمی امور تے وی ڳالھ مہاڑ کیتی ۔تاجکستان دے صدر ، صدر مملکت آصف علی زرداری کوں تاجکستان دے دورے دی دعوت ݙتی جیڑھی صدر مملکت قبول کر ڳھدی۔ خاتون اول محترمہ آصفہ بھٹو زرداری، چیئرمین پاکستان پیپلز پارٹی بلاول بھٹو زرداری تے پاکستان دے قطر وچ سفیر وی ملاقات وچ موجود ہن۔