اے پی پی اتے کویت نیوز ایجنسی وچال خبراں دے اشتراک اتے میڈیا تعاون دے ودھارے کیتے مفاہمت دی یادداشت تے دستخط

اسلام آباد۔ 4 نومبر(اے پی پی)ایسوسی ایٹڈ پریس آف پاکستان(اے پی پی) اتے کویت نیوز ایجنسی (کونا) منگل کوں خبراں دے اشتراک اچ تعاون کیتے مفاہمت دی ہک یادداشت (ایم او یو) تے دستخط کیتن۔ زوم تے تھیوݨ آلی ہک ورچوئل تقریب اچ، کویت اچ پاکستان دے سفیر ڈاکٹر ظفر اقبال، منیجنگ ݙائریکٹر اے پی پی محمد عاصم کھچی اتے کویت نیوز ایجنسی دے قائم مقام ݙائریکٹر جنرل محمد المنائی دے علاوہ ݙوہاں پاسوں دے سینئر حکام دی موجودگی اچ معاہدے تے دستخط کیتے ڳئے۔ سفیر ڈاکٹر ظفر اقبال ݙوہاں خبر رساں ایجنسیاں دے عہدیداراں دا تعارف کرایا اتے انہاں کوں پاکستان اتے کویت دے تعلقات کیتے ہک “تاریخی ݙینھ” اتے میڈیا تعاون اچ ہک نویں دور دے شروع تھیوݨ تے مبارکباد ݙتی۔ انہاں آکھیا جو اینڄھے ویلھے اچ جݙاں قابل اعتماد معلومات دا بہاؤ ٻہوں ضروری اے، اے مفاہمت نامہ ݙوہاں ملکاں کوں نیڑے گھن آوݨ اتے علاقائی رابطیاں کوں ودھاوݨ اچ مدد ݙیسی۔ انہاں پیشہ ورانہ صلاحیتاں کوں مضبوط کرݨ کیتے عوامی سطح تے لوکاں دے تبادلے اتے تربیتی پروگراماں دی اہمیت کوں وی اڳونہا کیتے۔ کونا دے قائم مقام ݙی جی محمد المنائی ایں معاہدے کوں میڈیا اتے صحافت دی تربیت اچ ڳہرے تعاون کیتے ہک دروازہ قرار ݙتا۔ انہاں تعاون اتے حمایت تے پاکستانی سفیر دا شکریہ ادا کیتا اتے ہک پائیدار شراکت داری دی امید کیتی جیںدے نال ثقافتی اتے پیشہ ورانہ تبادلے کوں وی ودھارا ملے۔ منیجنگ ݙائریکٹر اے پی پی محمد عاصم کھچی آکھیا جو دنیا ایں ویلھے “میڈیا اتے جوابی بیانیہ” دے دور توں گزردی پئی اے، جتھاں اینڄھی شراکت داری دی ودھ اہمیت اے۔ انہاں پاکستان اتے کویت دے وچال برادرانہ تعلقات تے زور ݙیتا اتے مشرق وسطیٰ دیاں میڈیا تنظیماں نال تعاون کوں مضبوط کرݨ کیتے اے پی پی دے عزم کوں دوہرایا۔ انہاں مزید آکھیا جو مفاہمت نامے نال ݙوہاں نیوز ایجنسیاں وچال نیڑے دی ہم آہنگی اتے استعداد کار اچ ودھارا تھیسی۔