پاکستان اتے ایران وچال میڈیا اتے ثقافتی تعاون دیاں پنڄ مفاہمتی یادداشتاں تے دستخط، قوماں دی ترقی، استحکام اتے خوشحالی اساݙا سانجھا وژن اے، عطاء اللہ تارڑ

اسلام آباد۔ 4 نومبر(اے پی پی)پاکستان اتے ایران نشریات، فلم، میڈیا ریگولیشن اتے ثقافتی تبادلیاں دے شعبیاں اچ تعاون ودھاوݨ کیتے پنج مفاہمتی یادداشتاں (ایم او یوز)  تے دستخط کیتن جیڑھے جو ݙوہاں برادر ملکاں وچال تعاون دے نویں مرحلے دی نشانی اے۔ مفاہمت دیاں یادداشتاں تے دستخط دی تقریب اچ اسلامی جمہوریہ ایران براڈ کاسٹنگ (آئی آر آئی بی) اتے پاکستان دے پنج وݙے میڈیا اداریاں پاکستان ٹیلی ویژن کارپوریشن (پی ٹی وی)، پاکستان الیکٹرانک میڈیا ریگولیٹری اتھارٹی (پیمرا)، باکس آفس پرائیویٹ لمیٹڈ، سب ٹی وی نیٹ ورک اتے وی ایس ایچ ٹی وی وچال اے معاہدے تھئین۔ تقریب اچ وفاقی وزیر اطلاعات و نشریات عطاء اللہ تارڑ، ایران دے سفیر رضا امیری مقدم، آئی آر آئی بی ورلڈ سروس دے نائب صدر احمد نوروزی، ایرانی وفد دے معزز ارکان، وزارت اطلاعات و نشریات دے سینئر افسران اتے ٻئے وی موجود ہن۔ ایں موقعے تے تقریب نال خطاب کریندے ہوئیں وفاقی وزیر اطلاعات عطاء اللہ تارڑ پاکستان اتے ایران وچال میڈیا دے شعبے اچ تعاون کوں چنگا قرار ݙیندے آکھیا جو قوماں دی ترقی، استحکام اتے خوشحالی اساݙا سانجھا وژن اے، اج میڈیا دے شعبے اچ تعاون عملی شکل اختیار کر ڳھدے، اے معاہدے میڈیا دے شعبے اچ ݙو طرفہ تعلقات کوں مزید مضبوط بݨیسن۔ انہاں آکھیا جو ایرانی صدر مسعود پزشکیان دا حالیہ دورہ پاکستان ٻہوں مفید ثابت تھئے، ایران دے صدر دا دورہ اساݙے ڳوڑھے برادرانہ تعلقات دا مظہر اے۔ انہاں آکھیا جو انہاں کوں ݙوہاں ملکاں دے میڈیا وچال تعاون دے ودھارے تے خوشی اے کیوں جو اساݙا مقصد لوکاں دی کامیابی اتے خوشحالی اے۔ عطاء اللہ تارڑ آکھیا جو پاکستان دا میڈیا ٻہوں متحرک اے جئیں دنیا کوں ݙیکھایا جو ایرانی عوام کیڑھے مقصد کیتے کھڑن۔ وفاقی وزیر آکھیا جو پاکستان ٹیلی ویژن اتے آئی آر آئی بی، پیمرا اتے ایرانی ریگولیٹری اتھارٹی وچال مفاہمت دیاں یادداشتاں تے دستخط چنڳے ہن، ایںدے نال میڈیا دے شعبے اچ تعلقات مزید مضبوط تھیسن۔ ایران دے سفیر رضا امیری مقدم وزیراعظم محمد شہباز شریف دا ݙوہاں برادر ملکاں وچال تعلقات دے ودھارے کیتے خلوص نال مسلسل کوششاں تے شکریہ ادا کیتا۔ انہاں آکھیا جو اطلاعات اتے پبلک ݙپلومیسی دے میدان اچ ذہین قیادت نال اساݙے ݙوہاں ملکاں وچال یادگار تعلقات دے ہک نویں باب دی شروعات تھئی اے۔ آئی آر آئی بی ورلڈ سروس دے نائب صدر احمد نوروزی آکھیا جو ݙوہاں ملکاں دے میڈیا خاص کر سرکاری میڈیا وچکار تعاون کوں مزید ودھاوݨ دی لوڑ اے اتے تعلقات ہݨ ہک نویں اتے متحرک مرحلے اچ داخل تھی ڳئن۔ انہاں آکھیا جو علامہ محمد اقبال، قائد اعظم محمد علی جناح اتے سید علی حمدانی جھیاں سانجھیاں شخصیتاں ساݙے وچال تعاون کوں ودھاوݨ کیتے مضبوط بنیاد ݙیندن۔ انہاں علامہ اقبال تے فلم یا سیریل بݨاوݨ دی تجویز کوں ایران ولوں پیش کرݨ کوں ہک اعزاز قرار ݙیتا۔ مفاہمت دیاں یادداشتاں نشریات، تربیت، مواد دی تیاری اتے ثقافتی تبادلیاں اچ تعاون ودھاوݨ کیتے ہن۔ جیویں جو پی ٹی وی اتے آئی آر آئی بی وچال پروگراماں دا تبادلہ تھیسی اتے خبریں اتے ثقافتی مواد سانجھا بݨایا ویسی۔ پیمرا اتے SATRA وچال ریگولیٹری تعاون مضبوط بݨایا ویسی۔