ملائیشیا کوں گوشت دی برآمدات ودھاوݨ کیتے جامع کاروباری ماڈل کوں جلدی حتمی شکل ݙیسوں، ہارون اختر خان

اسلام آباد۔ 5 نومبر (اے پی پی) وزیرِ اعظم دے معاونِ خصوصی برائے صنعت و پیداوار ہارون اختر خان آکھیا جو ملائیشیا کوں گوشت دی برآمدات ودھاوݨ کیتے جامع کاروباری ماڈل کوں جلدی حتمی شکل ݙے تے وزیرِ اعظم کوں منظوری کیتے پیش کیتا ویسی ۔ انہاں اے ڳالھ ٻدھ کوں اتھاں اعلیٰ سطح دے اجلاس دی صدارت کریندیں ہوئیں آکھی۔ اجلاس اچ کمیٹی دے تحت قائم چار ورکنگ گروپاں آپݨی رپورٹاں پیش کیتی۔ اجلاس اچ وزارتِ تجارت، صنعت و پیداوار اتے خوراک دے سینئر حکام دے علاوہ سرکاری تے نجی شعبے دے نمائندے وی شریک تھیے۔ ایں موقعے تے ہارون اختر خان آکھیا جو پاکستان اچ مضبوط لائیو اسٹاک (مویشی پروری) دی بنیاد موجود اے اتے پوری دنیا اچ حلال گوشت دے اعتبار نال ایںدی شہرت مسلّم اے۔ انہاں آکھیا جو معیار، تسلسل اتے مقابلے کوں بہتر بݨیندیں ہوئیں گوشت دی برآمدات ودھائی ونڄ سڳدی اے ۔ کمیٹی دی رپورٹ دے مطابق ایں شعبے اچ پاکستان کوں اج وی کئی چیلنجز ہن جنہاں اچ نِکے زناوراں دی گھٹکی، فیڈ لاٹ فنشنگ (موثر خوراکی پرورش) دا غیر ترقی یافتہ نظام اتے کمزور کولڈ چین انفراسٹرکچر شامل ہن۔ رپورٹ اچ سفارش کیتی ڳئی جو زناوراں دی پیداواری صلاحیت ودھائی ویسی ، جدید ذبح اتے پروسیسنگ ٹیکنالوجی اپنائی ویسی ، مضبوط حلال سرٹیفکیشن نظام یقینی بݨایا ویسی اتے لاجسٹکس دے ڈھانچے کوں بین الاقوامی معیار دے مطابق مضبوط کیتا ویسی ۔ ہارون اختر خان آکھیا جو مویشی پالݨ آمدن دا ہک اہم ذریعہ اے اتے پورے ملک اچ ہک کروڑ 20 لکھ توں ودھ گھرانے ایں شعبے نال جُڑے ہوئن۔ دیہاتی خاندان آپݨی آمدن دا تقریباً 35 توں 40 فیصد حصہ مویشیاں توں حاصل کریندن۔