ملک دی معاشی ترقی وچ تاجراں اتے سرمایہ کاراں دا کردار کلیدی اہمیت رکھیندے ، وفاقی وزیر خزانہ و محصولات محمد اورنگزیب

اسلام آباد۔ 5 نومبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو ملک دی معاشی ترقی وچ تاجراں اتے سرمایہ کاراں دا کردار کلیدی اہمیت رکھیندے۔ ٹیکس اصلاحات وچ تاجراں اتے سرمایہ کاراں دی مشاورت شامل ہوسی ۔ آوݨ آلے سال دا بجٹ ٹیکس پالیسی آفس بݨی اے۔ کراچی چیمبر آف کامرس اینڈ انڈسٹریز وچ تقریب نال خطاب کریندے انہاں آکھیا جو ملک دی معاشی ترقی وچ تاجراں اتے سرمایہ کاراں دا کردار کلیدی اہمیت رکھیندے۔ اساں کوں ریونیو اتے خرچے کوں رَل تے گھن تے ٹُرݨا ہوسی ۔ٹیکس اصلاحات وچ تاجراں اتے سرمایہ کاراں دی مشاورت شامل ہوسی ۔ انہاں آکھیا جو ٹیکس پالیسی آفس کوں ایف بی آر توں وزارت خزانہ مُنتقل کیتا ڳئے۔ آوݨ آلے سال دا بجٹ ٹیکس پالیسی آفس بݨائے۔ ایں دا بنیادی مقصد بجٹ کوں معاشی ترجیحات دے مطابق بݨاوݨ اے۔ ایں سلسلے وچ ڈاکٹر نجیب اتے انہاں دی ٹیم مشاورت کیتے دستیاب ہوسن۔ انہاں آکھیا جو وزیراعظم محمد شہباز شریف بزنس کمیونٹی نال میٹنگ دے بعد8  گروپ بݨائن۔ سارے گروپاں دے چیئرمین اتے ممبران نجی شعبے توں ہن اتے انہاں وچ کوئی وزیر کائنی اے۔ وزیراعظم 15 نومبر تئیں سفارشات اتے تجویزاں جمع کراوݨ دی ہدایت کیتی اے۔ انہاں دا آکھݨ ہئی جو وزیراعظم نجی شعبے دی قیادت وچ اقتصادی ترقی اتے ودھوتری تے یقین رکھیندن۔ معاشی استحکام توں اساں کوں ٻہوں فائدہ تھئے۔ پاکستان 500 ملین ڈالر دے یورو بانڈز دی ویلھے سِر ادائیگی کیتی اے۔ انہاں آکھیا جو ملکی وسائل کوں استعمال وچ گھن آوݨ اساݙی ترجیح اے۔ چھل دے بعد اساں آپݨے وسائل نال بحالی اتے تعمیر نو دا فیصلہ کیتا اتے اے ایں کیتے ممکن تھیا جو پاکستان معاشی طور تے مستحکم تھئے۔ وزیر خزانہ آکھیا جو پائیدار ودھوتری کیتے اساں کوں برآمدات وچ ودھوتری کرݨی ہوسی ۔ برآمدات وچ ودھوتری کیتے ہر یونٹ کوں آپݨا کردار ادا کرݨا چاہیدے۔ آٹو سیکٹر دی برآمدات شروع تھی چُکن۔ حکومت صنعتی خام مال دے ٹیرف وچ گھٹکی گھن آوݨ کیتے اقدامات کریندی پئی اے۔ انہاں آکھیا جو جنوب مشرقی ایشیا کوں وی ماضی وچ پاکستان جیڑھے مسئلیں دا سامݨا ہئی لیکن انہاں ملکاں اصلاحات دے ذریعے آپݨیاں معیشتاں کوں اوکھ توں کڈھیا۔ وزیر خزانہ آکھیا جو ایں بجٹ وچ سابق فاٹا اتے پاٹا کیتے انکم ٹیکس دی چھوٹ جاری رکھی ڳئی اے لیکن10 فیصد دی شرح نال سیلز ٹیکس لاتا ڳئے۔ انہاں آکھیا جو ٹیکسٹائل دا شعبہ ملکی برآمدات وچ ریڑھ دی ہݙی دی حیثیت رکھیندے۔ حکومت ٹیکسٹائل ودھاوݨ کیتے آپݨا کردار ادا کریسی ۔ وزیر خزانہ آکھیا جو ٹیکس پالیسی اتے 8 خصوصی گروپاں وچ چیمبرز کوں نمائندگی ݙتی ویسی ۔ حکومت ڈی ریگولیشن تے یقین رکھیندی اے۔ انہاں آکھیا جو آبادی وچ ودھوتری اتے موسمیاتی تبدیلیاں پاکستان کیتے ݙو بنیادی وجودی مسئلے ہن۔ انہاں مسئلیں نال نبڑݨ کیتے اقدامات ویلھے دی لوڑھ اے۔ ایں حوالے نال وفاق اتے صوبیں کوں رَل تے آپݨا کردار ادا کرݨا ہوسی ۔ ہک سوال تے انہاں آکھیا جو این ایف سی آئینی فورم اے اتے فورم متعلق معاملے اتھاں ہی طے تھیسن۔