سپیکر قومی اسمبلی سردار ایاز صادق دی صدارت اچ قومی اسمبلی دی ہاؤس بزنس ایڈوائزری کمیٹی دا اجلاس

اسلام آباد۔ 5 نومبر (اے پی پی) قومی اسمبلی دی ہاؤس بزنس ایڈوائزری کمیٹی دا اجلاس سپیکر قومی اسمبلی سردار ایاز صادق دی صدارت وچ تھیا۔ اجلاس وچ قومی اسمبلی دے21ویں اجلاس دے شیڈول اتے ایجنڈے تے ڳالھ مہاڑ کیتی ڳئی۔ اجلاس وچ قومی اسمبلی دے موجودہ اجلاس کوں 14 نومبر 2025ء جمعہ تئیں جاری رکھݨ دا فیصلہ کیتا ڳیا۔ سپیکر آکھیا جو پاکستان ایں ویلھے سفارتی، پارلیمانی اتے دفاعی اعتبار نال بہترین ویلھے توں لنگھدا پئے۔ کامیاب پارلیمانی سفارتکاری دی وجہ توں اڄ ایران دا پارلیمانی وفد پاکستان دے دورے تے آئے۔ انہاں آکھیا جو قومی اسمبلی دے 21 ویں اجلاس وچ وقفہ سوالات سودھے عوامی اہمیت دے حامل مسئلیں تے ڳالھ مہاڑ کیتی ویسی ۔ اجلاس وچ ڈپٹی سپیکر قومی اسمبلی سید غلام مصطفی شاہ، سینیٹر اعظم نذیر تارڑ، وفاقی وزیر ڈاکٹر طارق فضل چوہدری، خالد حسین مگسی، ممبر قومی اسمبلی سید نوید قمر، شیخ آفتاب احمد، اعجاز حسین جاکھرانی، سید حفیظ الدین، پولین بلوچ، نزہت صادق، نور عالم خان، سیدہ شہلا رضا، شازیہ مری اتے اعجاز الحق شرکت کیتی۔