کڄھ میڈیا ہاؤسز بغیر نوٹس دے صحافیاں کوں نوکریاں توں کڈھیے، صحافیاں دے حقوق دا تحفظ کیتا ویسی، وفاقی وزیر اطلاعات و نشریات عطاء اللہ تارڑ

اسلام آباد۔ 5 نومبر(اے پی پی)وفاقی وزیر اطلاعات و نشریات عطاء اللہ تارڑ آکھیے جو کڄھ میڈیا ہاؤسز بغیر نوٹس دے صحافیاں کوں نوکریاں توں کڈھیے، صحافیاں دے حقوق دا تحفظ کیتا ویسی، آندے ہفتے میڈیا مالکان نال ملاقات اچ اے معاملہ چایا ویسی۔ ٻدھ کوں قومی اسمبلی اجلاس اچ الیندے وفاقی وزیر اطلاعات عطاء اللہ تارڑ آکھیا جو میڈیا نمائندیاں اڄ اجلاس توں واک آؤٹ کیتے جیںدے بعد میں اتے امین الحق انہاں نال ملیے ہیں، صحافیاں دے ترائے چار مطالبے ہین ڄیڑھے بالکل جائز ہین۔ گزریل ݙینہاں کڄھ ٹی وی چینلز بغیر نوٹس دے، بغیر وجہ ݙسائے اتے بغیر ایڈوانس تنخواہواں دے کئی ملازماں کوں کڈھ ݙتے جنہاں اچ ورکنگ جرنلسٹ وی شامل ہن۔ وزیر اطلاعات آکھیا جو میڈیا اداریاں کوں حکومت ولوں ادائیگیاں ویلھے تے کیتیاں ویندیاں پئن اتے پی بی اے اتے اے پی این ایس نال ہر ملاقات اچ ایہو گزارش کیتی ویندی اے جو ادائیگیاں دا فائدہ میڈیا ورکرز اتے جرنلسٹس تئیں پڄݨا چاہیدے۔ انہاں ݙسایا جو ایں سانڳے پی بی اے اتے اے پی این ایس نال اگلے ہفتے اہم میٹنگ طے تھی چُکی اے۔ عطاء اللہ تارڑ آکھیا جو اڄ پی ایف یو جے دا وفد ملیے جیندے اچ افضل بٹ، مظہر عباس، آصف بشیر چوہدری، صاحبزادہ ذوالفقار اتے نیئر علی شامل ہن، انہاں دی موجودگی وچ اے طے پایا جو پی ایف یو جے آپݨا چارٹر آف ڈیمانڈ پیش کریسی جیکوں اگلے ہفتے میڈیا مالکان دے سامݨے رکھیا ویسی اتے پی بی اے اتے اے پی این ایس نال ٻہہ تے ایںدا دیرپا حل کڈھیا ویسی۔ وفاقی وزیر آکھیا جو الیکٹرانک اتے پرنٹ میڈیا دے ملازماں دے حقوق دے تحفظ دا طریقہ کار موجود اے، اخبارات کیتے آئی ٹی این ای اتے ٻئے فورمز کم کریندے پئن جݙاں جو پیمرا اچ کونسل آف کمپلینٹس وی موجود اے جیںدے اچ پی ایف یو جے دے ممبران شامل ہوندن، ٻھل ڈیجیٹل میڈیا دے ملازماں کیتے ایں ویلھے کوئی اینجھا میکنزم موجود کائنی جتھاں او آپݨے مسائل چا سڳن۔ عطاء اللہ تارڑ آکھیا جو حکومت ریگولیشنز بݨا ݙتن، قانون سازی وی پوری اے اتے نکتہ پلیٹ فارم توں جنہاں صحافیاں کوں نوکریاں توں کڈھیا ڳئے، انہاں ساریاں کوں 48 گھنٹیاں وچ نوکریاں ݙیتیاں ویسن۔ انہاں نیشنل پریس کلب تے حملے دے حوالے نال آکھیا جو بطور وزیر اطلاعات اوں ویلھے واضح موقف اختیار کیتا ہئی اے جو اے حملہ میݙے گھر تے حملے آلی ڳالھ اے، ایں حوالے نال وزارت داخلہ نال ڳالھ مہاڑ چلدی پئی اے اتے این پی سی تے حملے دی رپورٹ کَل جمع کرا ݙتی ویسی جیںدے بعد رَل تے ایںدا وی حل کڈھیا ویسی۔ عطاء اللہ تارڑ آکھیا جو او سارے صحافتی نمائندہ اداریاں پی بی اے، اے پی این ایس، سی پی این ای، پی ایف یو جے اتے این پی سی کوں آپݨا حلقہ سمجھدن اتے صحافیاں دے مسئلیاں دا حل اساݙی پہلی ترجیح اے۔ انہاں یقین دہانی کرائی جو سارے صحافیاں دے حقوق دے تحفظ کوں یقینی بݨایا ویسی۔