پاکستان اَتے قطر وچال سانجھ علاقائی امن، توانائی دی حفاظت اَتے سماجی ترقی کیتے سٹریٹجک اہمیت دی حامل اے، صدر آصف علی زرداری دا قطر دے انگریزی اخبار “دی پیننسولا” کوں خصوصی انٹرویو

دوحہ۔ 6 نومبر (اے پی پی(  صدر مملکت آصف علی زرداری خطے اچ امن اَتے ڳالھ مہاڑ ودھاوݨ کیتے قطر دے تعمیری کردار دی تعریف کریندیں ہوئیں آکھیا جو پاکستان اَتے قطر وچال سانجھ علاقائی امن، توانائی دی حفاظت اَتے سماجی ترقی کیتے سٹریٹجک اہمیت دی حامل اے۔ پاکستان اَتے خلیجی ملک افرادی قوت دی دستیابی، ہُنر ودھاوݨ اَتے پائیدار سرمایہ کاری اچ تعاون ودھا سڳدن۔ پاکستانی برادری دا کردار پاکستان اَتے قطر دے دیرینہ تعلقات کیتے ہک مضبوط پُل دی حیثیت رکھیندے۔ پاکستان دے سماجی تحفظ دے نظام اچ بائیومیٹرک تصدیق نال امدادی رقم شفاف طریقے نال حقدار تئیں پُڄدی اے۔ اساں ہک ایجھا پاکستان چاہندوں جِتھاں ہر خاندان کوں سماجی تحفظ ہووے، تریمتاں معاشی طور تے آزاد ہوون اَتے نینگراں کوں عزت دا روزگار مِلے۔ انہاں اے ڳالھیں قطر دے انگریزی اخبار “دی پیننسولا” کوں ݙتے ڳئے ہک خصوصی انٹرویو اچ آکھی۔ صدر آکھیا جو قطر خطے اچ امن کیتے اہم ثالث دا کردار ادا کیتے، خاص طور تے حماس اَتے بین الاقوامی فریقاں وچال مذاکرات اچ سہولت ݙیوݨ اَتے امریکا اَتے طالبان وچال مذاکرات دی میزبانی کرݨ نال افغان امن عمل دی راہ ہموار تھئی اَتے پاکستان دے علاقائی تحفظات بارے اہم پیش رفت تھئی۔ انہاں ݙسایا جو پاکستان اَتے قطر وچال گہری اَتے سانجھی مشترکہ مذہب، ثقافت اَتے آپسی احترام تے مُبنی اے۔ 1972 اچ سفارتی تعلقات قائم تھیوݨ دے بعد توں ݙوہیں ملکاں سیاسی، معاشی، دفاعی، توانائی اَتے انسانی شعباں اچ تعاون مسلسل ودھایا اے۔ اجوکی جغرافیائی اَتے سیاسی صورتحال اچ اے سانجھ علاقائی امن، توانائی دی حفاظت اَتے سماجی ترقی کیتے ہک سٹریٹجک اہمیت دی حامل اے۔ انہاں آکھیا جو ݙوہیں ملک قطر اچ پاکستانی افرادی قوت دی خدمتاں کوں قدر دی نظر نال ݙیکھدِن اَتے تربیت اَتے سماجی تحفظ دے شعبیاں اچ تعاون ودھاوݨ تے غور کریندے پئِن۔ قطر اچ رہݨ آلی پاکستانی برادری اساݙے دیرینہ تعلقات دا مضبوط پُل اے، جنہاں دی محنت اَتے پیشہ ورانہ صلاحیتاں دا قطر دی غیر معمولی ترقی اچ اہم حصہ اے۔ صدر آکھیا جو پاکستان قطر دے ڳالھ مہاڑ اَتے سفارت کاری دے کردار کوں قدر دی نظر نال ݙیکھدے، خاص طور تے حماس اَتے ٻئے فریقاں وچال رابطیاں اچ ہم آہنگی اَتے دوحہ I اَتے دوحہ II عمل دے ذریعے امن کوں اڳوں ودھاوݨ کیتے۔ انہاں آکھیا جو دوحہ عمل دا مقصد علاقائی اَتے عالمی سطح تے رَل مِل تے کم کرݨ دے امکانات پیدا کرݨ اے۔ پاکستان اَتے خلیجی ملک افرادی قوت دی دستیابی، ہُنر ودھاوݨ اَتے پائیدار سرمایہ کاری اچ تعاون ودھا سڳدن۔ غربت، تعلیم اَتے صحت دے مسئلیاں بارے انہاں آکھیا جو اساں اے چیلنجز سماجی تحفظ اَتے انسانی وسیلے اچ سرمایہ کاری دے ذریعے حل کریندے پئیوں۔ بے نظیر انکم سپورٹ پروگرام دے تحت 90 لکھ توں ودھ خانداناں کوں سِدھی مالی امداد ݙتی ویندی پئی اے جݙاں جو وسیلہ تعلیم اَتے نشوونما سویں پروگرام نینگراں دی تعلیم اَتے غذائی معیار کوں بہتر کریندے پئِن۔