ہندو برادری دے بندیاں کوں پاکستان اچ داخلے توں روکݨ دے الزام بے بنیاد اتے گمراہ کن ہن، ترجمان وزارت خارجہ

اسلام آباد۔6نومبر(اے پی پی) وزارت خارجہ دے ترجمان طاہر حسین اندرابی بعض بھارتی میڈیا رپورٹس اچ ہندو برادری دے بندیاں کوں پاکستان اچ داخلے توں روکݨ دے الزام کوں سختی نال مسترد کریندے ہوئیں انہاں کوں بے بنیاد اتے گمراہ کن قرار ڈتے۔ خمیس کوں دفتر خارجہ دے ترجمان آپݨے بیان اچ آکھیا جو پاکستان کݙاہیں وی مذہبی بنیاداں تے کہیں کوں داخلے توں نئیں روکیا اتے اے الزام حقائق کوں وڳاڑݨ اتے ہک معمولی انتظامی معاملے کوں سیاسی رنگ ݙیوݨ دی ہک ٻئی کوشش ہین۔ انہاں ݙسایا جو بھارت اچ پاکستانی ہائی کمیشن بابا گورو نانک دیو جی دی سالگرہ دی تقریباں (4 توں 13 نومبر 2025ء) اچ شرکت کیتے بھارت توں آوݨ والیں 2,400 توں ودھ سکھ یاتریاں کوں ویزے جاری کیتے۔ انہاں آکھیا جو 4 نومبر کوں 1,932 یاتری اٹاری-واہگہ بارڈر دے رستے پاکستان اچ کامیابی نال داخل تھیے جݙاں جو تقریباً 300 ویزہ ہولڈرز کوں بھارتی حکام سرحد پار کرݨ توں روک ݙتا۔ انہاں واضح کیتا جو پاکستانی امیگریشن دا عمل مکمل طور تے منظم، شفاف اتے بغیر کہیں رکاوٹ دے پورا تھیا۔ انہاں ول ݙسیا جو کجھ بندیاں دے سفری کاغذات ادھورے ہن اتے او امیگریشن حکام کوں اطمینان بخش وضاحت ݙیوݨ اچ کامیاب نئیں تھی سڳے جیںدے تے انہاں کوں معمول دے طریقہ کار دے مطابق واپس ول ونجݨ دی ہدایت کیتی گئی۔ انہاں آکھیا جو اے دعویٰ جو انہاں بندیاں کوں مذہبی بنیاداں تے روکیا ڳیا، سراسر غلط، گمراہ کن اتے شرانگیز اے۔ پاکستان ہمیشہ سارے مذہباں دے زائراں کوں آپݨے مقدس مقاماں دی زیارت کیتے خوش آمدید آھدے اتے ایں سانڳے ہک واضح اتے سوکھا فریم ورک ٻݨائے۔ ترجمان آکھیا جو اے قدم خالصتاً انتظامی نوعیت دا ہئی اتے پاکستان دے آپݨی زمین اچ داخلے کوں منظم کرݨ دے خودمختار حق دے مطابق ہئی۔ انہاں افسوس کیتا جو ایں معاملے کوں بھارتی حکومت اتے میڈیا ولوں مذہبی اتے سیاسی رنگ ݙیوݨ دی کوشش کیتی ویندی پئی اے جو انہاں دے اندر ودھدی ہوئی متعصبانہ سوچ دی عکاسی کریندی اے۔