اسلام آباد کشمیری ٻھیݨ بھراواں دا گھر اے، معرکہ حق اچ شکست توں بعد دشمن کوڑیاں ویڈیوز نال پاکستان اتے اداریاں دے خلاف نفرت کھنݙیندا پئے، طارق فضل چوہدری اتے طلال چوہدری دی مشترکہ پریس کانفرنس

اسلام آباد۔ 7 نومبر (اے پی پی)وفاقی وزیر پارلیمانی امور ڈاکٹر طارق فضل چوہدری اتے وزیر مملکت برائے داخلہ طلال چوہدری آکھیے جو اسلام آباد کشمیری ٻھیݨ ٻھراواں دا گھر اے، اے تاثر ٹھیک کائنی جو اسلام آباد اچ چیکنگ دے ناں تے کشمیریاں کوں تنگ کیتا ویندے، سارے پاکستانیاں دے دلاں اچ کشمیر کیتے جیڑھی محبت اے اوکوں کوئی وی ختم نئیں کر سڳدا، معرکہ حق اچ تھیوݨ آلی شکست توں بعد ساݙا دشمن اینجھیاں کوڑیاں ویڈیوز کھنݙا تے پاکستان اتے اداریاں دے خلاف نفرت ونݙیندا پئے، بغیر تصدیق اینجھیاں ویڈیوز کوں شیئر کرݨ غیر قانونی اتے غیر اخلاقی اے، اینجھیاں ویڈیوز بݨاوݨ آلیاں دے خلاف کارروائی کیتی ویسی۔ انہاں اے ڳالھ اسلام آباد اچ ہک مشترکہ پریس کانفرنس کریندے آکھی۔ وفاقی وزیر پارلیمانی امور ڈاکٹر طارق فضل چوہدری آکھیا جو حالیہ ݙینہاں اچ سوشل میڈیا اُتے کڄھ اینڄھیاں ویڈیوز اتے پوسٹس ݙیکھݨ اچ آندیاں پئن جنہاں نال کوڑا پروپیگنڈا کھنݙایا ویندا پئے، ایں پروپیگنڈے دا مقصد پاکستان اتے اداریاں دے خلاف نفرت کھنݙاوݨ اے، اے اساݙے دشمن دا ایجنڈا اے، معرکہ حق اچ پاکستان کوں دشمن اُتے جیڑھی برتری ملی اتے دشمن بدترین شکست کھادی، ایندے بعد ہݨ او سوشل میڈیا تے کوڑے پروپیگنڈے اچ مصروف اے، اینڄھے عناصر کوں بے نقاب کرݨ ساݙی ذمہ داری اے، نویں نسل اینجھیاں ویڈیوز کوں بغیر تصدیق اگو تے شیئر کرے اتے نا یقین کرے۔ انہاں آکھیا جو میں ہک خاص واقعے دا ݙسیساں، جیڑھا اوں ویلھے تھئے جݙاں جوائنٹ ایکشن کمیٹی اپݨا لانگ مارچ جاری رکھی ہوئی ہئی۔ انہاں آکھیا جو دھیر کوٹ اچ انہاں دا پولیس نال ٹاکرا تھیا اتے دھیر کوٹ نال تعلق رکھݨ آلی ہک تریمت اوں ویلھے موقعے تے پُجّی، انہاں زخمی پولیس آلیاں کوں اپݨی گݙی اچ سٹیا اتے باغ ہسپتال گھن ڳئی۔ انہاں آکھیا جو باغ ہسپتال اچ جݙاں لوکاں ݙٹھا جو او تریمت اسلام آباد پولیس آلیاں کوں ڳھن آئی اے تاں انہاں اوں گڈی اُتے حملہ کیتا، ایں واقعے کوں ہݨ اے ݙیکھایا ویندا پئے جو اے واقعہ اسلام آباد اچ پیش آئے۔ انہاں آکھیا جو وزیراعظم ایندا فوری نوٹس ڳھدے اتے وفاقی وزراء سودھا راجہ پرویز اشرف اتے قمر زمان کائرہ اُتے مشتمل ہک کمیٹی بݨائی ڳئی، کمیٹی دے جوائنٹ ایکشن کمیٹی نال مذاکرات دے ترائے رائونڈ تھئے اتے ایں معاملے کوں سلجھایا ڳیا، ایہ اساݙے آزاد کشمیر دے بھیݨ بھراواں اتے شہریاں نال بے مثال محبت اے، وزیراعظم 30 ارب دی گرانٹ ݙیوݨ دا آکھیے اتے ہر صورت ایہ مسئلہ حل کرݨ دی تاکید کیتی اے۔ انہاں آکھیا جو پاکستانیاں دے دلاں اچ کشمیر کیتے جیڑھی محبت اے اوکوں اینڄھا کوئی وی پروپیگنڈا ختم نئیں کر سڳدا، مسئلہ کشمیر دے حل تئیں اساں اپݨیاں کوششاں جاری رکھیسوں، معرکہ حق دے بعد مسئلہ کشمیر ٻیا اڳونہا تھئے، کشمیریاں دی پاکستان کیتے محبت وی بے مثال اے، کشمیریاں پاک فوج دے جواناں دے شانہ بشانہ تھی تے پاکستان نال اپݨی محبت دا ثبوت ݙتا اتے اے رشتہ کݙاہیں کمزور نئیں تھی سڳدا، اساݙا ایہ رشتہ ویلھے دے نال ٻٰا تکڑا تھیسی۔ ایں موقع تے وزیر مملکت برائے داخلہ طلال چوہدری آکھیا جو اینجھیاں ویڈیوز نال اے تاثر ݙتا ویندا پئے جو اسلام آباد اچ کشمیری ٻھیݨ ٻھراواں نال چنڳا سلوک نئیں تھیندا پیا، جیڑھا جو سراسر من گھڑت اتے حقائق دے خلاف اے، اسلام آباد پولیس ہک ذمہ دارانہ کردار ادا کریندی پئی اے، اسلام آباد پولیس امن و امان دے نال نال غیر ملکی مہماناں دا وی تحفظ کریندی اے، ایںدے اچ کہیں وی قسم دی گھٹکی وزارت داخلہ اتے حکومت برداشت نئیں کریندی اتے اسلام آباد پولیس دی سختی نال مانیٹرنگ کیتی ویندی اے۔ انہاں آکھیا جو اے پراݨیاں اتے نامکمل ویڈیوز ہن، جعلی اتے نویں آوازاں بھر تے ویڈیوز اپ لوڈ کیتیاں ویندیاں پئن، انہاں کوں بغیر تصدیق دے کھنݙاوݨ آلے وی ایںدے اچ ذمہ دار بݨ ویندن، حالی مذاکرات شروع تھئے ہی ہن جو اے خبراں چلاوݨ شروع کر ݙتیاں ڳئن جو اسلام آباد پولیس توں تازہ دم دستے آزاد کشمیر بھیجے ویندے پئن جیںدا مقصد انہاں مذاکرات کوں ناکام بݨاوݨ ہا۔ انہاں آکھیا جو اے تاثر ٹھیک کائنی جو اسلام آباد اچ چیکنگ دے ناں تے کشمیری ٻھیݨ ٻھراواں نال چنڳا سلوک نئیں کیتا ویندا، وفاقی پولیس دی ذمہ داری اے جو او لوکاں دی جان و مال دے تحفظ کیتے چیکنگ کریندی اے، اساں ویڈیوز دا فرانزک کرائے، انہاں اچ آوازاں بھریاں ڳئن اتے جوڑ توڑ کر تے اینجھیاں ویڈیوز بݨائیاں ڳئن اتے اے نامکمل ویڈیوز ہن۔ انہاں آکھیا جو اسلام آباد پاکستان دا دارالخلافہ اے، اے کشمیری ٻھیݨ ٻھراواں دا گھر اے، اساں ایں معاملے اچ ٻہوں وݙا صبر ݙکھیندے پئے ہیں، اینجھیاں ویڈیوز کوں بغیر تصدیق شیئر کرݨ غیر قانونی اتے غیر اخلاقی عمل اے، کوئی وی اینجھیاں ویڈیوز اُتے یقین نہ کرے، اینجھیاں ویڈیوز بݨاوݨ آلیاں دے خلاف کارروائی کیتی ویسی۔