آذر بائیجان دے یوم فتح دی تقریب، وزیر اعظم شہباز شریف دی شرکت، ترکیہ اتے پاکستان دا ساتھ ساݙا ترکہ اے، الہام علییو دا خطاب

اسلام آباد۔ 8 نومبر(اے پی پی) آذربائیجان دے صدر الہام علیوف اپݨے یومِ فتح دی تقریب نال خطاب کریندے آکھیا جو پاکستان اَتے ترکیہ ڄیویں سافا ساتھ ݙتے، او کݙاہیں وی بھلایا نئیں ونڄ سڳدا۔ آذربائیجان دے یومِ فتح دی شاندار تقریب اچ باکو دی فضا پاکستان دے قومی ترانے نال گونج اٹھی، وزیراعظم شہباز شریف خصوصی طور تے شرکت کیتی، پاکستان آرمی دے خصوصی دستے وی پریڈ اچ حصہ گھدا۔ آذربائیجان دے یومِ فتح دی تقریب اچ ترکیہ دے صدر طیب اردوان وی شامل ہن، آذری صدر الہام علیوف وزیراعظم شہباز شریف کوں تقریب اچ شرکت دی دعوت ݙتی ہئی، تقریب اچ پاکستان، ترکیہ اَتے آذربائیجان دے قومی ترانے وڄائے ڳئے ۔ تقریب نال خطاب اچ صدر الہام علیوف آکھیا جو ساریاں مہماناں کوں خوش آمدید آھداں، ترکیہ اَتے پاکستان ڄیویں ساݙا ہتھ ونفائے او قابل تعریف اے، وزیراعظم شہباز شریف دے آذربائیجان نال اظہارِ یکجہتی تے شکریہ ادا کرینداں۔ صدر الہام علیوف آکھیا جو پاکستان اَتے ترکیہ ہمیشہ آذربائیجان دی پوری حمایت کیتی اے، اوکھے ویلھے اچ سنڳت ڄیویں ساتھ ݙتے او ساڈا وݙا ترکہ اے۔ آذربائیجان دے صدر آکھیا جو شوشا شہر دی آرمینیا توں آزادی اساڈی وݙی فتح اے، آذربائیجان دیاں فوجاں میدانِ جنگ اچ آپݨاں لوہا منوایا۔ ایں موقع تے ترکیہ دے صدر طیب اردوان آکھیا جو آذربائیجان دے یومِ فتح دی پنجویں تقریب اچ شرکت کرݨ تے خوشی تھئی اے، آذربائیجان دی حکومت اَتے عوام کوں مبارکباد ݙینداں، وزیراعظم شہباز شریف دی تقریب اچ شرکت تے ٻہوں خوشی اے۔ صدر رجب طیب اردوان آکھیا جو اساں اتحاد اَتے یکجہتی نال اڳو تے ودھدا رہݨے، اساں تریئے ملک ہک خاندان وانگوں ہیسے، پاکستان، ترکیہ اَتے آذربائیجان دا اتحاد مزید مضبوط تھیسی، کاراباخ دی فتح نال ناانصافی دے ہک دور دا خاتمہ تھیا، امن معاہدہ آذربائیجان اَتے آرمینیا دی قیادت دی دانشمندی دا ثبوت اے۔