طالبان دے اقتدار اچ آوݨ دے بعد پاکستان تے دہشتگردانہ کارروائیاں ودھین، افغان حکومت اپݨی سرزمین پاکستان دے خلاف استعمال تھیوݨ توں روکݨ اچ ناکام رہی اے، ترجمان دفتر خارجہ

اسلام آباد۔ 9 نومبر(اے پی پی)ترجمان دفتر خارجہ طاہر حسین اندرابی آکھیے جو طالبان دے اقتدار اچ آوݨ دے بعد پاکستان تے دہشتگردانہ کارروائیاں ودھین، افغان حکومت اپݨی سرزمین پاکستان دے خلاف استعمال تھیوݨ توں روکݨ اچ ناکام رہی اے۔ اپݨے بیان اچ انہاں آکھیے جو پاکستان اتے افغانستان وچال مذاکرات دا تریجھا دور ترکیہ اَتے قطر دی ثالثی اچ استنبول اچ تھئے ٻھل ایندے اچ کوئی پیشرفت نئین تھی سقی۔ انہاں آکھیا جو گزریل چار سالاں اچ جَݙاں توں طالبان حکومت افغانستان اچ آئی اے، پاکستان تے افغان سرزمین توں دہشت گرد حملیاں وچ ؤفا ودھارا تھئے، پاکستان دی توقع ہئی جو طالبان حکومت ٹی ٹی پی دے عناصر دے خلاف ٹھوس اقدامات کریسی، ٻھل اے تھی نئیں سڳیا، پاکستان دی بنیادی توقع اے ہئی جو افغان سرزمین کوں پاکستان دے خلاف استعمال نہ تھیوݨ ݙتا ویسی، ٻھل طالبان حکومت ایںدے تے عمل درآمد اچ ناکام رہی۔ انہاں آکھیے جو ٹی ٹی پی اَتے بی ایل اے ریاستِ پاکستان اَتے عوام دے دشمن ہِن اَتے جو کوئی وی اُنہاں دی حمایت کریندے، او پاکستان دا خیرخواہ نئیں تھی سڳدا۔ ترجمان آکھیا جو طالبان نمائندیاں ݙوجھے اَتے تریڄھے دور اچ عملی اقدامات توں گریز کیتے اتے الزام تراشی اَتے اشتعال انگیزی دے ذریعے ماحول خراب کرݨ دی کوشش کیتی۔ پاکستان دا بنیادی موقف اے ہئی جو افغان سرزمین تے موجود دہشت گرد عناصر دے خلاف ٹھوس اَتے تصدیق تھیوݨ جوڳے اقدامات کیتے ون٘جن۔