سینیٹ اچ شاعرِ مشرق ڈاکٹر علامہ محمد اقبال دے جمݨ ݙینھ تے قرارداد اتفاق رائے نال منظور

اسلام آباد۔ 9 نومبر(اے پی پی) سینیٹ شاعرِ مشرق، مفکرِ اسلام اَتے عظیم فلسفی ڈاکٹر علامہ محمد اقبال دے جمݨ ݙینھ تے ہک قرارداد اتفاق رائے  نال منظور کیتی اے جیندے اچ اُنہاں دیاں فکری، ادبی اَتے سیاسی خدمتاں کوں خراجِ عقیدت پیش کیتا ڳئے۔ ایوان بالا دے اجلاس اچ سینیٹر شیری رحمن اے قرارداد پیش کیتی، قرارداد اچ علامہ اقبال کوں شاعرِ مشرق اَتے ہک وکھری مسلمان ریاست دے تصور دے معمار دے طور تے مَنّیا ڳیا، جیڑھا اُنہاں 1930 دے مشہور الہ آباد خطبے اچ پیش کیتا ہا۔ قرارداد اچ زور ݙتا ڳئے جو اقبال دی شاعری، فلسفہ اَتے سیاسی سوچ اڄ وی قوم اَتے نویں نسل کیتے حوصلے، خودی، اتحاد اَتے جرات دا سرچشمہ ہِن۔ قرارداد اچ آکھیا ڳئے جو پورے ملک اچ اقبال دیاں تعلیمات اَتے فلسفے کوں نصابِ تعلیم اَتے عوامی ڳالھ مہاڑ دا حصہ بݨایا ویسی تانجو نویں نسل کوں خودی، خود اعتمادی اَتے وطن دی خدمت دے جذبے نال بھرپور کیتا ونڄ سڳے۔ قرارداد اچ آکھیا ڳئے جو یوم اقبال کوں صرف یاد کرݨ آلے ݙینھ دے طور تے نئیں ٻھل اقبال دے پیغام اَتے نظریات نال عملی وابستگی دے ݙینھ دے طور تے منایا ونجے۔ سینیٹ حکومت، سول سوسائٹی اَتے تعلیمی اداریاں توں مطالبہ کیتا جو اُو اقبال دی زندگی اَتے تعلیمات اُتے سیمینارز، تقریباں اَتے ثقافتی سرگرمیاں کرن تانجو اُنہاں دے پیغام کوں عام کیتا ونڄ سڳے۔ قرارداد موجب پاکستان کوں آزادی، مساوات اَتے انصاف دے اصولاں اُتے مبنی ہک انسان دوست اَتے ترقی پسند معاشرہ بݨایا ویسی، جیڑھا علامہ اقبال آپݨے افکار اچ سوچیا ہا۔