سینیٹ اجلاس،27ویں آئینی ترمیمی ٻل متعلق قائمہ کمیٹی دی رپورٹ پیش

اسلام آباد۔10نومبر(اے پی پی) سینیٹ اجلاس وچ 27ویں آئینی ترمیمی ٻل متعلق قائمہ کمیٹی دی رپورٹ پیش کر ݙتی ڳئی۔ سینیٹ اجلاس وچ قائمہ کمیٹی قانون و انصاف دے چیئرمین سینیٹر فاروق ایچ نائیک اے رپورٹ ایوان وچ پیش کیتی۔ایں دے بعد رپورٹ دے خاص خاص نقطیں دا ایوان کوں ݙسیندے انہاں آکھیے جو 27ویں آئینی ترمیم دا ٻل سینیٹ اتے قومی اسمبلی دیاں قائمہ کمیٹیاں کوں بھیجیا ڳیا ہئی جئیں دا سانجھا اجلاس تھیا۔ کمیٹی ٻل وچ ٻہوں ساریاں تبدیلیاں تجویزکیتیاں، 26ویں ترمیم وچ آئینی بینچ بݨائے ڳئن، وفاقی آئینی عدالت دا قیام میثاق جمہوریت دا حصہ اے۔کمیٹی27ویں ترمیم وچ وی وفاقی آئینی عدالت دے قیام دی منظوری ݙتی اتے تجویز ݙتی جو ایں وچ سارے صوبیں دی برابر دی نمائندگی اتے اسلام آباد ہائیکورٹ دی نمائندگی ہووے، ایں آئینی عدالت دے جج کیتے ہائیکورٹ وچ کم کرݨ دا پنج سال دا تجربہ ہووے، کمیٹی ہائیکورٹس دے ججاں دے تقرری اتے تبادلے دے حوالے نال وی تجویزاں پیش کیتن۔