صدر آصف علی زرداری دا خیبر پختونخوا وچ سکیورٹی فورسز دیاں دہشت گرداں دے خلاف کامیاب کاروائیاں تے خراجِ تحسین

اسلام آباد۔10نومبر (اے پی پی) صدرِ مملکت آصف علی زرداری خیبر پختونخوا وچ سکیورٹی فورسز دیاں دہشت گرداں دے خلاف کامیاب کاروائیاں تے خراجِ تحسین پیش کریندے آکھیے جو ’’عزمِ استحکام‘‘ دے تحت دہشت گردی دے ناسور دے خاتمے تئیں کاروائیاں جاری رہسن۔ ایوانِ صدر دے میڈیا وِنگ توں جاری بیان موجب، صدرِ مملکت انٹیلی جنس دی بیس تے شمالی وزیرستان اتے درہ آدم خیل وچ کیتیاں ڳئیاں کاروائیاں وچ کامیابی کوں قوم دے عزم اتے استقلال دا مظہر قرار ݙتا۔ صدر آصف علی زرداری آکھیا جو فتنہ الخوارج اتے ایں دے بھارت نواز سہولت کار پاکستان دے امن اتے استحکام دے دشمن ہن، وطنِ عزیز توں ٻاہرلے ملکاں دی پشت پناہی وچ سرگرم دہشت گرداں دا مکمل خاتمہ قومی اتفاقِ رائے نال کیتا ویندا پئے۔ صدر مملکت آصف علی زرداری شہیداں کوں خراجِ عقیدت اتے سکیورٹی فورسز دے عزم اتے حوصلے کوں خراجِ تحسین پیش کیتا۔ صدر مملکت ایں عزم دا اعادہ کیتا جو ’’عزمِ استحکام‘‘ دے تحت دہشت گردی دے ناسور دے خاتمے تئیں کاروائیاں جاری رہسن