سینیٹ 27ویں آئینی ترمیمی ٻل  ݙوتہائی اکثریت نال منظور کر ڳھدا

اسلام آباد۔10نومبر (اے پی پی) سینیٹ 27ویں آئینی ترمیمی ٻل دوتہائی اکثریت نال منظور کرڳھدے ۔ سینیٹ اجلاس اچ وفاقی وزیر قانون و انصاف اعظم نذیر تارڑ تحریک پیش کیتی جو 27ویں آئینی ترمیمی ٻل قائمہ کمیٹی توں رپورٹ کردہ صورت اچ ایوان اچ پیش کرݨ دی اجازت ݙتی ونڄے جیں کوں ݙوتہائی اکثریت نال منظور کرڳھدا گئے۔اجلاس اچ وزیر قانون اعظم نذیر تارڑ ترامیم ایک ھک کرتے پیش کیتی۔ اپوزیشن دے شور شرابے اچ 27ویں ترمیمی ٻل دی شق وار منظوری دے دوران سینیٹر سیف اللہ ابڑو پی ٹی آئی دے احتجاج اچ شامل نی تھئے تے ترمیم دے حق اچ ووٹ ݙتا ، جے یو آئی سینیٹر احمد خان اتے سینیٹر نسیمہ احسان وی ترمیم دے حق اچ ووٹ ݙتا۔ترمیم دے حق اچ 64 اتے مخالفت اچ صرف 2 ووٹ پاتے ڳئن ۔ ایویں حکومت 27ویں آئینی ترمیم سانڳے ݙو تہائی اکثریت حاصل کرݨ اچ کامیاب تھی ڳئی۔اپوزیشن دے اعتراض دے بعد ول ڳنتری کیتی ڳئی لیکن چئیرمین سینیٹ آکھیے جو ترمیم دے حق اچ 64 ووٹ آئے اتے کہیں مخالفت نی کیتی ،  آئینی عدالت دے قیام متعلق آرٹیکل 42اچ ترمیم کثرت رائے نال منظور تھی ڳئی ،  آرٹیکل 59اچ ترمیم وی کثرت رائے نال منظور کیتی ڳئی ۔ آرٹیکل 63اے اچ لفظ سپریم دی جاہ وفاقی آئینی عدالت کرݨ دی ترمیم منظوری ݙتی ڳئی، آرٹیکل 68 اچ پارلیمانی بحث دے حوالے نال وفاقی آئینی عدالت دا ذکر شامل کرݨ دی ترمیم منظور کیتی ڳئی۔آرٹیکل 78 اچ ترمیم متعلقہ پیراگراف اچ وفاقی آئینی عدالت دا ذکر شامل کرݨ دی ترمیم دی منظور کیتی ڳئی ۔آرٹیکل 81 دے ݙوہیں پیراگراف اچ عدالت دا اضافہ کرݨ دی ترمیم وی مںظور کیتی ڳئی ۔آرٹیکل 114اچ وفاقی آئینی عدالت دا ناں شامل کرݨ ، آرٹیکل 130اچ وزرائے اعلیٰ دے مشیراں دی تعداد اچ ودھارے ، آرٹیکل 165 اے اچ وفاقی آئینی عدالت دے ناں دا اضافہ کرݨ آرٹیکل 175 دی تعریف اچ وفاقی آئینی عدالت پاکستان دا ذکر شامل کرݨ تے آئین پاکستان اچ آرٹیکل 175اے اچ ترامیم منظور کرڳھدیاں ڳئن ۔جوڈیشل کمیشن دی تشکیل نو توں متعلق سپریم کورٹ اتے وفاقی آئینی عدالت دے ھک ھک سینئر ججز شامل کرݨ، اعلیٰ عدلیہ اچ ججاں دی تعیناتی سانڳے آرٹیکل 175اے اچ ترمیم، وفاقی آئینی عدالت دے چیف جسٹس جوڈیشل کمیشن دے ممبر ہوݨ دی ترمیم وی منظور کرڳھدی ڳئی ۔منظور ترمیم دے مطابق سپریم کورٹ دے چیف جسٹس وی جوڈیشل کمیشن دے ممبر ہوسن ، سپریم کورٹ اتے وفاقی آئینی عدالت سینئر ھک ھک جج وی جوڈیشل کمیشن دے ممبر ہوسن ۔ آرٹیکل 175 ڈی اچ ترمیم کثرت رائے نال منظور کرڳھدی ڳئی ، آرٹیکل 175ڈی اچ آئینی عدالت دے ججز تں ول حلف گھنݨ دی ترمیم وی منظور کرڳھدی ڳئی، آئینی عدالت دے جج آئین پاکستان دے تھرڈ شیڈول موجب حلف گھنسن ۔منظور کردہ ترمیم موجب وفاقی آئینی عدالت دے فیصلے دا اطلاق پاکستان دی ساری عدالتاں سودھے سپریم کورٹ تے وی تھیسی ، سپریم کورٹ دے کہیں فیصلے دا اطلاق وفاقی آئینی عدالت تے نہ ہوسی ، سپریم کورٹ دے فیصلے دا اطلاق ملک آئینی عدالت دے سوائے ملک دی ساریاں عدالتاں تے ہوسی ، آئینی بنچز اچ مفاد عامہ دے سارے مقدمیں وفاقی آئینی عدالت اچ منتقل ہوسن ۔ترمیم موجب وفاقی آئینی عدالت اچ ہائی کورٹ دا او جج ممبر بݨ سڳدے جیں ہائی کورٹ اچ گھٹ توں گھٹ 5سال بطور جج خدمات ݙتیاں ہوون ۔چیف جسٹس وفاقی آئینی عدالت کوں جوڈیشل کمیشن اچ نمائندگی ݙیوݨ دی ترمیم وی منظور کر ڳھدی ۔ ساریاں 59 شقاں ݙوتہائی اکثریت نال منظور کیتیاں ڳئن ۔ وفاقی وزیر برائے قانون و انصاف اعظم نذیر تارڑ ترامیم دی شق وار منظوری دے بعد مذکورہ بل منظوری سانڳے ایوان اچ پیش کیتا ۔ بعد اچ چیئرمین سینیٹ ایوان اچ بل دی مںظور دا طریقہ کار پڑھ تے  سݨایا۔ پنج منٹ گھنٹیاں وڄاوݨ دے بعد ایوان دے دروازے بند کر ݙتے ڳئے۔ چیئرمین سینیٹ ٻل دے حامی ارکان کوں سڄی لابی اتے مخالف ارکان کوں کٻھی لابی دے پاسے ونڄݨ دی ہدایت کیتی جیں دے بعد ارکان دی ڳنتری کیتی ڳئی ۔ ٻل دے حق اچ 64 ووٹ جݙاں جو مخالفت اچ کوئی وی ووٹ نی پیا ۔ ایویں اے ٻل ݙوتہائی اکثریت نال منظور کر ڳھدا ڳیا۔