ستاویھویں آئینی ترمیم سینیٹ توں منظور کیتی ڳئی صورت اچ قومی اسمبلی اچ پیش کر ݙِتی ڳئی، ایوان اچ چنڳی گالھ مہاڑ دے بعد منظور کیتا ونجے، وزیر قانون اعظم نذیر تارڑ

اسلام آباد۔11نومبر (اے پی پی) 27 ویں آئینی ترمیم سینیٹ توں منظور کیتی ڳئی صورت اچ قومی اسمبلی اچ پیش کر ݙِتی ڳئی جڈاں جو وزیر قانون اعظم نذیر تارڑ آکھیا جو سینیٹ توں منظور کیتے ڳئے آئینی ترامیم دے بل اچ آئینی عدالت دے قیام، ازخود نوٹس دے خاتمے، ججاں دے ہائی کورٹ دی سطح تے تبادلے، فیلڈ مارشل دے عہدے کوں تاحیات آئینی تحفظ اتے صدر مملکت کوں عہدے توں فارغ تھیوݨ دے بعد چھُٹی (استثنا) شامل اے، ایں تے ایں ایوان اچ چنڳی گالھ مہاڑ دے بعد ایں کوں منظور کیتا ونجے۔ ایں وچوں بہوں ساری ترامیم میثاق جمہوریت دی روح دے مطابق ہن۔ منگل کوں قومی اسمبلی اچ بل پیش کرݨ دے بعد ایں دے خاص خاص پہلو ݙسیندے ہوئیں انہاں ݙسایا جو 26 ویں آئینی ترمیم دے بعد کافی گالھ مہاڑ دے بعد میثاق جمہوریت اچ قوم نال کیتے ڳئے وعدے دے مطابق آئینی عدالت دا قیام وی شامل ہا۔ اپوزیشن دے آکھݨ تے اساں آئینی بنچز دے قیام تے اتفاق کیتا اتے ایں کوں منظور کیتا۔ ججاں دی تعیناتی دنیا بھر اچ عدلیہ، انتظامیہ اتے مقننہ رَل تے کریندن۔ 8 ارکان ہک کمیشن دے فیصلے کوں سنگل بنچ تبدیل کر ݙِتّا۔ اے ترمیم پاس تھئی تاں ول وی اعتراض کیتے ڳئے۔ عدالت دا ویلھا 30 توں 40 فیصد آئینی معاملے گھن ڳئے۔ ہک آزاد آئینی عدالت تے ساریاں دی رائے ڳھدی ڳئی۔ رَلیاں جماعتاں نال وی ویلھے ویلھے تے مشاورت کیتی ڳئی، ایں وچ ایں عدالت دے قیام دا فیصلہ تھیا۔ ایں بل کوں سینیٹ آف پاکستان ݙو تہائی اکثریت نال منظور کیتے۔ اے میثاق جمہوریت دی روح دے مطابق اے۔ انہاں ݙسایا جو چاریں صوبیاں اتے اسلام آباد ہائی کورٹ کوں وی ایں اچ نمائندگی ݙتی ڳئی اے۔ انہاں ݙسایا جو رَلوی کمیٹی اچ ایں تے غور تھیا، اتھاں ایں اہم اتے حساس معاملے اچ آپݨی رئیاں توں اپوزیشن ولّوں نوازیا ونجݨا چاہیدا ہا پر ایجھا نئیں تھیا۔ جمیعت علما اسلام دے ارکان اجلاس اچ شرکت کیتی پر ایںدے بعد انہاں پارٹی پالیسی دے تحت واک آؤٹ کیتا۔ انہاں آکھیا جو سوموٹو نوٹس نال مُلک دے وزراء اعظم کوں گھر بھیجیا ڳیا، معاشی ضیان چاوݨے پئے، ایں کوں سینیٹ توں منظور کیتے ڳئے بل اچ ختم کر ݙِتا ڳئے۔ ججاں دے تبادلے دے حوالے نال آرٹیکل 200 دے تحت صدر مملکت کہیں وی ہائیکورٹ توں جج دا ݙوجھے ہائی کورٹ اچ تبادلہ کر سڳدے جئیں دا تبادلہ جتھ تھیوݨے ݙوہیں ہائی کورٹس دے چیف جسٹس، چیف جسٹس پاکستان دی رضا مندی نال اے تبادلے ہوندن۔ ہݨ گالھ مہاڑ دے بعد ایں آرٹیکل اچ ترمیم تھئی اے۔ جوڈیشل کمیشن کوں تعیناتی اتے ریگولرائزیشن کرݨ آلے کمیشن کوں تبادلہ دا اختیار ݙِتا ڳئے۔ اگر کوئی ایں تبادلے توں انکار کریسی او کوں ریٹائر سمجھیا ویسی۔ فیصلہ تھیوݨ دے بعد، 209 دے بعد، سپریم جوڈیشل کونسل ایں دے خلاف انکار تے کارروائی کر سڳسی۔ انہاں آکھیا جو آرٹیکل 84 دے تحت آئینی عدالت دے اختیارات اوہے ہوسن جیڑھے آئینی بنچ دے کول ہن۔ 199 دے تحت ہائی کورٹس اچ رِٹ پٹیشنز تے جاری آرڈرز دی حداں وی آئینی عدالت کوں منتقل کیتی ڳئن۔ لٹکے پئے فوجداری، دیوانی، ٹیکس، نال متعلق تے ٻئے 60، 62 ہزار مقدمے سپریم کورٹ ای سݨسی۔ سپریم کورٹ دے کول انہاں مقدمیاں کوں سݨݨ کیتے ویلھا وی ہوسی اتے توجہ وی ہوسی۔ انہاں ݙوہیں عدالتاں دے چیف جسٹس صاحبان اچ جیڑھا سینئر ہوسی او جوڈیشل کمیشن دی صدارت کریسی۔ انہاں ݙسایا جو اے ابہام جو سینئر چیف جسٹس کوں ہوسی ایں کوں وی ایں ترمیم اچ مدنظر رکھ تے حل کیتا ڳئے۔ انہاں ݙسایا جو خیبر پختونخوا اچ سینیٹ دے انتخابات اچ دیر تھئی جئیں دی مختلف وجہاں ہن، ہک سال ݙو مہینے دی دیر تھئی۔ سینیٹ دی مدت 6 سال اے، ایں دیر نال انتخاب اتے مدت دا تعین کیتا ڳیا۔ 243 مسلح افواج دے سربراہان دے بارے وچ اے۔ مئی 2025 اچ پاکستان تے ہمسایہ مُلک بلا اشتعال حملہ کیتا، قوم ہک آواز تھی تے مسلح افواج دا ساتھ ݙِتّا اتے ہک تاریخی کامیابی حاصل تھئی، ایں دی پذیرائی پوری دنیا اچ تھئی، او آئی سی، گلف، چین، سعودیہ، ترکیہ، آذربائیجان اساڈا ساتھ ݙِتّا۔ امریکی صدر سمیت دنیا دی لیڈرشپ اساݙی مسلح افواج دی کارکردگی دی تعریف کیتی۔ قوم دے بہادر سپوت چیف آف آرمی سٹاف کوں مشورت نال انہاں دی کارکردگی، حکمت عملی، بہادری تے فیلڈ مارشل دا اعزاز نال نوازیا ڳیا۔ بھارت ولوں پہلگام فالس فلیگ تے پاکستان تے حملہ دا خطرہ ہا ایں دا بھرپور جواب ݙِتا ڳیا۔ انہاں ݙسایا جو آرمی چیف دی تقرری وزیر اعظم دی ایڈوائس تے صدر مملکت دی مرضی نال کیتی ویندی اے۔ فیلڈ مارشل ہک تاحیات عہدہ اے، پارلیمان ہک مقتدر ادارہ اے، پاکستان دے عوام دا اے مُنتخب ایوان ای قائد ایوان دا انتخاب کریندے۔ قومی ہیروز کوں ایں قسم دے ٹائٹل واپس گھنݨ دا اختیار کہیں ہک بندے کوں نئیں بلکہ اے اختیار پارلیمان کوں ݙِتا ڳئے جو او جوائنٹ سیشن اچ ایں دا فیصلہ کرے۔ انہاں ݙسایا جو صدر کوں تاحیات چھُٹی دنیا اچ مِلدی اے، ایں ترمیم دے بعد پاکستان اچ ریٹائرمنٹ دے بعد وی انہاں کوں اے چھُٹی حاصل ہوسی۔ اساں ایں تے مشورت کیتی، منظوری اچ کوئی جلدی نئیں کیتی۔ پوری کوشش کیتی جو اساں ساریاں کوں اعتماد اچ گھن تے ٹروں۔ رَلوی کمیٹی اچ گھنٹیاں ایں تے غور تھیے۔ 27 ویں ترمیم اچ 59 ترامیم اچوں اکثریت آئینی ہن ایں تے ایں ایوان اچ چنڳی گالھ مہاڑ کرائی ویسی اتے ول ایں کوں منظور کرایا ویسی۔ انہاں اتحادی جماعتاں دا شکریہ ادا کیتا جنہاں رہنمائی اتے معاونت کیتی۔ انہاں اپوزیشن توں گزارش کیتی جو او بردباری نال ایں بحث اچ حصہ گھنّے۔