پوری دنیا اچ جاری تنازعیاں امن دی اہمیت کوں ٻیا اُجاگر کیتے، پاکستان ثابت کر ݙِتّا جو او آپݨی خودمختاری اتے علاقائی سالمیت دے تحفظ کیتے ہر قیمت ادا کرݨ کیتے تیار اے، وزیراعظم شہباز شریف دا بین الپارلیمانی سپیکرز کانفرنس توں خطاب

اسلام آباد۔11نومبر (اے پی پی) وزیر اعظم محمد شہباز شریف امن تے استحکام کوں پائیدار ترقی دی بنیاد قرار ݙیندیں ہوئیں آکھیا جو دنیا بھر اچ جاری تنازعیاں امن دی اہمیت کوں ٻیا اُجاگر کیتے، پاکستان ثابت کر ݙِتّا جو اوآپݨی خودمختاری اتے علاقائی سالمیت دے تحفظ کیتے ہر قیمت ادا کرݨ کیتے تیار اے، پُرامن اتے مستحکم افغانستان ای علاقائی میل جول، ترقی اتے خوشحالی دی کُنجی اے، افغان عبوری حکومت ٹی ٹی پی اتے ٻئے گروپاں دے خلاف موثر کارروائی کرے، کوئی مُلک کلھّا ترقی نئیں کر سڳدا، پاکستان مکمل معاشی اصلاحات کریندا پئے۔ اے ڳالھیں انہاں منگل کوں اتھاں بین الپارلیمانی سپیکرز کانفرنس توں خطاب کریندیں ہوئیں کیتی۔ ایں موقع تے چیئرمین سینیٹ سید یوسف رضا گیلانی، سیکرٹری جنرل آئی ایس سی اکناتھ دھکل وی موجود ہن۔ کانفرنس اچ پوری دنیا توں مندوبین اتے پارلیمانی وفداں شرکت کیتی۔ وزیر اعظم آکھیا جو او پوری دنیا توں کانفرنس اچ شرکت کیتے آوݨ آلے سپیکرز، پارلیمنٹیرینز اتے مندوبین کوں خوش آمدید آکھدن۔ انہاں آکھیا جو پاکستان کیتے ایں اہم کانفرنس دا تھیوݨ عزت دی گالھ اے جئیں دے ذریعے پارلیمانی قیادت امن، سلامتی اتے ترقی دے رَلویں وژن تے گالھ مہاڑ کیتے اتھاں رَلی اے۔ انہاں چیئرمین سینیٹ اتے آئی ایس سی دے بانی چیئرمین سید یوسف رضا گیلانی کوں خاص طور تے سراہیا جنہاں دی کوششاں اتے عزم ایں فورم کوں حقیقت اچ بݨایا۔ وزیر اعظم آکھیا جو ایں کانفرنس دا موضوع ’’امن، سلامتی اتے ترقی‘‘ بہوں ویلھے تے اتے بہوں اہم اے۔ اگرچہ اے موضوع اتھاں موجود سارے ملکاں کیتے اہمیت رکھیندے پر پاکستان کیتے اے خاص اہمیت دا حامل اے۔ انہاں آکھیا جو 1947 اچ آزادی دے بعدوں پاکستان ہمیش مذاکرات اتے سفارتکاری دے ذریعے امن دا حامی رہیے۔ اساں پکا یقین رکھیندے ہیسے جو امن اتے سلامتی دیرپا قومی تے علاقائی ترقی دی بنیاد اے۔ امن دی اصل قدر اوں ویلھے ساریاں توں ودھ محسوس تھیندی اے جݙݨ اساں انہاں تنازعیاں دا سامݨا کریندے ہیسے جنہاں دی وجہ توں اج وی دنیا جلدی پئی اے۔ وزیر اعظم یاد ݙوایا جو پاکستان وی ایں بحرانی کیفیت دا سامݨا سِدّھا اتے بالواسطہ ݙوہیں اندازاں نال کیتے پر اساں ہمیش امن اتے استحکام حاصل کرݨ کیتے آپݨی جدوجہد جاری رکھی۔ انہاں شرکاء کوں آگاہ کیتا جو ایں سال مئی اچ پاکستان کوں چڑھدی سرحد توں بلا اشتعال جارحیت دا سامݨا کرݨا پیا جئیں اچ اساݙی پیشہ ورانہ اتے بہادر مسلح افواج شاندار تیاری اتے بہترین کارکردگی دا مظاہرہ کیتا اتے اساݙی زمینی اتے ہوائی دفاع کیتے ویلھے تے اتے پکے فیصلے نال کیتی ڳئی کارروائی نہ صرف دشمن دے ارادیاں کوں ناکام بݨایا بلکہ پوری دنیا دے سامݨے اے حقیقت ظاہر کر ݙِتی جو پاکستان آپݨے دفاع، خودمختاری اتے علاقائی سالمیت دے دفاع توں کہیں وی قیمت تے پچھوں نہ ہٹسی۔ وزیر اعظم آکھیا جو ہک پُرامن افغانستان علاقائی میل جول، ترقی اتے خوشحالی دی کُنجی اے۔ بدقسمتی نال اتھاں امن حاصل کرݨ کئی دہائیاں توں ناکام رہیے پر پاکستان کݙاہیں وی امید نئیں چھوڑی۔ اساں پُرامن ہمسائیگی تے یقین رکھیندویں اتے ایں مقصد کیتے مسلسل کوشش کریندے پئیوں اتے اے انتہائی بدقسمتی اے جو عسکریت پسند گروہ نہ صرف افغانستان دے اندر بلکہ سرحد پار وی امن کوں خطرے اچ پیندے پئن۔ گزریل مہینے جݙݨ اساڈی سرحدی چوکیاں تے افغانستان ولوں حملہ کیتا ڳیا تاں اساݙا جواب سِدّھا اتے حتمی ہا۔ اساں انہاں عناصراں کوں نہ بھلݨ آلا سبق سکھایا جنہاں پاکستان تے حملہ کرݨ دی جُرت کیتی۔ وزیر اعظم ایں ضمن اچ برادر ملکاں خاص طور تے ترکیہ اتے قطر دی کوششاں کوں سراہیا جنہاں پاکستان اتے افغان طالبان وچال مذاکرات اچ سہولت ݙتی۔ وزیر اعظم آکھیا جو پاکستان ہمیش مظلوماں دے حق اچ آواز اُچی کیتی اے بھاویں او غزہ دا معاملہ ہووے یا بھارتی غیر قانونی قبضے دے شکار جموں تے کشمیر دے مظلوم عوام یا او سارے مُلک جنہاں کوں اج وی بنیادی حقوق اتے آزادیاں توں محروم رکھیا ڳئے۔ انہاں آکھیا جو اساݙی مستقل وابستگی امن اتے سلامتی کوں ودھاوݨ نال اے، بھاویں او اقوام متحدہ ہووے، او آئی سی، ای سی او، ایس سی او یا ٻئے اہم عالمی پلیٹ فارمز۔ وزیر اعظم پارلیمان کوں عوام دی خواہشات دا امین قرار ݙیندیں ہوئیں آکھیا جو عوام دے مُنتخب نمائندے ایں قومی اتے عالمی پندھ اچ انتہائی اہم کردار رکھیندن۔ اساں آپݨی عوام دی مُقدس امانت دے نگران ہیسے اتے اساکوں انہاں دی امیداں تے پورا لہݨے۔ آپݨی پوری قابلیت اتے چنڳی نیت نال آپݨی قوم دی رَلوی بہتری کیتے کم کرݨا پوسی۔ انہاں ایں توقع دا اظہار کیتا جو کانفرنس دے دوران تھیوݨ آلی بامقصد گالھ مہاڑ نویں رستے ݙکھیسی اتے رَلیاں کوششاں کوں اڳوں ودھاوݨ اچ مدد ݙیسی۔ انہاں ایں گالھ تے زور ݙِتّا جو ساریاں ملکاں دے عوام امن دے فروغ، پائیدار ترقی دے حصول اتے رَلوی سلامتی دے استحکام کیتے متحد تھیوݨ تاںجو اساں پکے امن اتے رَلویں خوشحال مستقبل دی تعمیر کر سڳوں۔