وزیراعظم شہباز شریف دی صدارت اجلاس، جناح میڈیکل کمپلیکس دی جلدی تکمیل اچ آوݨ الی رکاوٹاں کوں دور کرݨ دی ہدایت

اسلام آباد۔11نومبر (اے پی پی) وزیر اعظم محمد شہباز شریف جناح میڈیکل کمپلیکس دی جلدی تکمیل اچ آوݨ آلی رکاوٹاں کوں سارے متعلقہ اداریاں دے سانجھے تعاون نال جلدی توں جلدی دور کرݨ اتے معیاری تعمیر اتے جدید سہولتاں کوں یقینی بݨاوݨ دی ہدایت کیتی اے۔ منگل کوں وزیراعظم آفس دے میڈیا ونگ ولّوں جاری بیان موجب، وزیراعظم محمد شہباز شریف دی صدارت جناح میڈیکل کمپلیکس اینڈ ریسرچ سینٹر دی تعمیر تے پیش رفت دے حوالے نال جائزہ اجلاس تھیا۔ اجلاس اچ وفاقی وزیر برائے منصوبہ بندی احسن اقبال، وفاقی وزیر برائے صحت مصطفی کمال، وفاقی وزیر برائے اقتصادی امور احد خان چیمہ اتے ٻئے متعلقہ سرکاری عہدیداراں شرکت کیتی۔ وزیراعظم اجلاس اچ ہدایت کیتی جو جناح میڈیکل کمپلیکس دی سارے جدید طبی سہولتاں نال معیاری تعمیر کوں مکمل حکمت عملی دے تحت پورا کیتا ونجے۔ کمپلیکس دی جلدی تکمیل اچ آوݨ آلی رکاوٹاں کوں متعلقہ اداریاں دے رَلویں تعاون نال جلدی توں جلدی حل کیتا ونجے اتے مقامی آبادی کوں طبی سہولتاں فراہم کرݨ کیتے جناح میڈیکل کمپلیکس ولوں ذیلی طبی مرکز دی تعمیر کیتے کم کیتا ونجے۔ وزیراعظم جناح میڈیکل کمپلیکس دی تعمیر اتے جدید علاج دی فراہمی اچ لوڑھ موجب بین الاقوامی ماہراں دی خدمات گھنݨ دی وی ہدایت کیتی۔ وزیراعظم کوں بریفنگ وچ ݙسایا ڳیا جو جناح میڈیکل کمپلیکس کیتے مطلوبہ زمین حاصل کر ڳھدی ڳئی اے اتے ڈیزائن کنسلٹنٹ دا چُݨاؤ وی کر ڳھدا ڳئے۔ وزیراعظم دی ہدایت موجب منصوبے دی تھرڈ پارٹی ویلیڈیشن کوں وی یقینی بݨایا ویسی۔ اجلاس اچ وزیراعظم کوں جناح میڈیکل کمپلیکس تے ریسرچ سینٹر دی تعمیر دے حوالے نال ہݨ تئیں کیتے ڳئے انتظامات، کارکردگی اتے پیشرفت تے بریفنگ ݙِتی ڳئی۔ وزیراعظم سارے متعلقہ وزارتاں اتے اداریاں کوں رَلویں تعاون نال ایں منصوبے کوں جلدی توں جلدی مکمل کرݨ دی خصوصی ہدایت ݙِتی۔