کیڈٹ کالج وانا توں فورسز ہݨ تئیں 115 لوکاں کوں محفوظ طریقے نال ریسکیو کر ڳھدے، سکیورٹی ذرائع

راولپنڈی۔11نومبر (اے پی پی) کیڈٹ کالج وانا جنوبی وزیرستان اچ سکیورٹی فورسز ہݨ تئیں 115 لوکاں کوں محفوظ طریقے نال ریسکیو کر ڳھدے ، کالج اچ موجود 3 افغان خوارجیاں کوں کالج دی ہک مخصوص عمارت تئیں محدود کر ݙِتا ڳئے۔ سکیورٹی ذرائع دے مطابق کیڈٹ کالج تے حملے دے ویلھے 525 کیڈٹس سمیت تقریباً 650 لوک موجود ہن، سکیورٹی فورسز ہݨ تئیں 115 لوکاں کوں محفوظ طریقے نال ریسکیو کر ڳھدے ۔ کیڈٹ کالج اچ موجود 3 افغان خوارجیاں کوں کالج دی ہک مخصوص عمارت تئیں محدود کر ݙِتا ڳئے، سکیورٹی فورسز علاقے کوں گھیر گِھدّے، جئیں عمارت اچ افغان خوارج موجود ہن او کیڈٹس دی رہائشی عمارتاں توں کافی فاصلے تے واقع اے، اجے تئیں سارے کیڈٹ محفوظ ہن۔ سکیورٹی ذرائع دے مطابق افغان خوارجیاں دی کالج اچ موجودگی دی وجہ توں کیڈٹس دی جاناں دے تحفظ کوں ݙیکھدیں ہوئیں آپریشن نہایت احتیاط نال جاری اے۔ کالج دی حداں توں کیڈٹس کوں کڈھݨ دا عمل ہولی ہولی جاری اے، ایں ویلھے وی کالج دے اندر تقریباً 535 لوک موجود ہن۔ وانا کیڈٹ کالج اچ موجود 3 افغان خوارجیاں دے خلاف آپریشن پوری شدت نال جاری اے۔ واضح رہے جو 10 نومبر کوں افغان خوارجیاں کالج دے مرکزی گیٹ تے بارود نال بھری ہوئی گاݙی ٹکرا ݙتی ہئی۔ دھماکے نال کالج دا مرکزی دروازہ مکمل طور تے ݙہہ ڳیا جڈاں جو نیڑے دی عمارتاں کوں وی ضیان تھیے۔ پاک فوج دے جواناں بہادری نال کارروائی کریندیں ہوئیں ݙو خوارجیاں کوں موقع تے ای مار ݙِتا ہا۔ معصوم قبائلی ٻالاں تے حملہ کرݨ آلے دہشت گرداں دا نہ اسلام نال کوئی تعلق اے نہ پاکستان دی خوشحالی نال اے۔ سکیورٹی ذرائع آکھیا جو دہشت گرداں دے مکمل خاتمے تئیں سکیورٹی فورسز دا آپریشن جاری رہسی۔