وزیراعظم شہباز شریف دی اسلام آباد دے سیکٹر جی الیون اچ کچہری اچ بھارتی پشت پناہی اچ سرگرم فتنہ الخوارج اتے فتنہ الہندوستان دے دہشت گردانہ حملے دی مذمت

اسلام آباد۔11نومبر (اے پی پی) وزیراعظم محمد شہباز شریف اسلام آباد دے سیکٹر جی الیون اچ کچہری اچ بھارتی پشت پناہی اچ سرگرم فتنہ الخوارج اتے فتنہ الہندوستان ولّوں دہشت گردانہ حملے دی بھرپور مذمت کریندیں ہوئیں آکھیا جو دہشت گرداں دی ایجھی بزدلانہ کارروائیاں دہشت گردی دے خلاف اساݙے عزم کوں کمزور نئیں کر سڳدی، دہشت گردی دے عفریت دے مکمل خاتمے اتے فتنہ الہندوستان تے فتنہ الخوارج دے آخری دہشت گرد دے خاتمے تئیں جنگ جاری رکھیسوں۔ منگل کوں وزیراعظم آفس دے میڈیا ونگ توں جاری بیان موجب، وزیراعظم دہشت گردانہ حملے اچ شہید تھیوݨ آلے لوکاں دے بلندی درجات اتے اہلِ خانہ کیتے صبر جمیل دی دعا کیتی۔ انہاں آکھیا جو مئیں سودھے پوری قوم دی ساری ہمدردیاں شہداء دے اہلِ خانہ دے نال ہِن۔ وزیراعظم زخمیاں دی جلدی صحت یابی کیتے دعا کیتی اتے انہاں کوں بہترین طبی سہولتاں فراہم کرݨ دی ہدایت کیتی۔ وزیراعظم آکھیا جو بھارتی دہشت گرد پراکسیاں ولّوں پاکستان دے نہتے شہریاں تے دہشت گردانہ حملے قابل مذمت ہِن۔ انہاں واقعے دی تحقیقات دی ہدایت کریندیں ہوئیں آکھیا جو ذمہ داراں کوں انہاں دے انجام تئیں پڄا تے ساہ گھنسوں۔ وزیراعظم آکھیا جو افغانستان توں کارروائی کریندے بھارتی اشارے تے سرگرم فتنہ الخوارج ولّوں ایں ویلھے وانا اچ معصوم ٻالاں تے وی حملہ کیتا ڳیا، بھارتی پشت پناہی اتے افغان سرزمین توں جاری انہاں حملیاں دی جِتنّی وی مذمت کیتی ونجے گھٹ اے۔ انہاں آکھیا جو نہتے تے معصوم پاکستانیاں دے خون کوں رائیگاں نہ ونڄݨ ݙیسوں، دہشت گردی دے عفریت دے مکمل خاتمے اتے فتنہ الہندوستان تے فتنہ الخوارج دے آخری دہشت گرد دے خاتمے تئیں انہاں دے خلاف جنگ جاری رکھیسوں۔ وزیراعظم آکھیا جو دہشت گرداں دی ایجھیاں بزدلانہ کارروائیاں دہشت گردی دے خلاف اساݙے عزم کوں کمزور نئی کر سڳدی، بھارت کوں خطے اچ پراکسیاں دے ذریعے دہشت گردی کھنڈاوݨ دے بھیڑے فعل توں باز رہݨا چاہیدے۔ انہاں آکھیا جو ویلھا آ ڳئے جو دنیا کوں بھارت دی ایجھی بھیڑی سازشاں دی مذمت کرݨی چاہیدی اے، بھارت دا خطے اچ امن تباہ کرݨ آلا بھیانک مُنہ پوری دنیا دے سامݨے بُری طرح بے نقاب تھی ڳئے، ݙوہیں حملے خطے اچ بھارتی ریاستی دہشت گردی دی بدترین مثال ہِن۔