آئینی ترمیم ویلھے دی لوڑھ اے، 10 کروڑ لوکاں کوں غربت توں کڈھݨ کیتے اساں کوں رَل تے کم کرݨا ہوسی، وفاقی وزیر سرمایہ کاری قیصر احمد شیخ

اسلام آباد۔11نومبر(اے پی پی) وفاقی وزیر سرمایہ کاری قیصر احمد شیخ آکھیے جو آئینی ترمیم ویلھے دی لوڑھ اے ، اتفاق رائے دے بغیر اساں قومی معیشت کوں بہتر نی بݨا سڳدے، 10 کروڑ لوکاں کوں غربت توں کڈھݨ کیتے اساں کوں رَل تے کم کرݨا ہوسی۔ قومی اسمبلی دے اجلاس وچ 27ویں آئینی ترمیم تے بحث وچ حصہ گھندے وفاقی وزیر آکھیا جو اڄ اسلام آباد کچہری وچ خودکش حملہ افسوسناک اے، اساݙا اصل مسئلہ اتفاق رائے دا فقدان اے، ہک حملے نال جانی ضیان دے علاوہ مجموعی سرمایہ کاری دے ماحول کوں ضیان پُڄے۔انہاں آکھیا جو وزیراعظم محمد شہباز شریف ول ول میثاق معیشت دی ڳالھ کیتی، میثاق معیشت کیتے اتفاق رائے ضروری اے، ایں ویلھے اساݙیاں برآمدات 32 ارب ڈالر ہِن، مُلک وچ سرمایہ کاری دا حجم پڑوسی ملکاں دے مقابلے وچ ٻہوں گھٹ اے، اتفاق رائے دے بغیر اساں قومی معیشت کوں بہتر نی بݨا سڳدے۔ انہاں دا آکھݨ ہئی جو آئینی ترمیم ضروری اے ، میکوں خوشی اے جو آرمی چیف کیتے ڈیفنس فورسز دے چیف دا عہدہ متعارف کرایا ویندا پئے، اڄوکے پاک بھارت جنگ وچ فیلڈ مارشل عاصم منیر قابل فخر کردار ادا کیتا۔ انہاں آکھیا جو امن و امان دی صورتحال وچ بہتری نال مجموعی ماحول وچ بہتری آسی۔وفاقی وزیر آکھیا جو آئینی کیسز نال عدالت دا ودھ ویلھا لڳدا ہئی اتے ایں نال عام شہریاں دے مقدمے تاخیر دا شکار تھی ویندے ہن، آئینی عدالت دے قیام نال عام لوکاں دے مقدمیں کوں وقتی نبیڑݨ وچ مدد مِلسی۔ انہاں آکھیا جو 18ویں آئینی ترمیم دے بعد اختیارات دی تلویں سطح تے منتقلی دا عمل مکمل نئیں تھی سڳیا، تعلیم دا شعبہ صوبیں کوں منتقل تھیوݨ نال بہتری نئیں آئی، تعلیم اتے ٻئے شعبیں وچ اصلاحات کیتے رَل تے کم کرݨ دی لوڑھ اے۔ انہاں دا آکھݨ ہئی جو آبادی وچ ودھارے دی شرح 3.2 فیصد اے جڈاں جو ایں شرح نال مجموعی قومی پیداوار وچ ودھارا نئیں تھیندا پیا، 10 کروڑ لوکاں کوں غربت توں کڈھݨ کیتے اساں کوں رَل تے کم کرݨا ہوسی۔