عدالتی نظام دی ڈیجیٹل تبدیلی عوامی سہولت کیتے تاریخی قدم اے، چیف جسٹس یحییٰ آفریدی

اسلام آباد۔11نومبر(اے پی پی) چیف جسٹس آف پاکستان جسٹس یحییٰ آفریدی آکھیے جو عدالتی نظام دی ڈیجیٹل تبدیلی ضلعی عدالتاں توں گھن تے سپریم کورٹ تئیں عوام کوں سوکھا، شفاف اتے تکھا انصاف ݙیوݨ دے پاسے ہک تاریخی اتے عوامی مرکزیت تے مبنی اقدام اے۔ اے ڳالھ انہاں منگل کوں سپریم کورٹ وچ پورے مُلک وچ ای کورٹ سسٹم دے قیام، عدالتی نظام دی خودکاریت (آٹومیشن) اتے ڈیجیٹلائزیشن تے پیشرفت دے حوالے نال منعقدہ ہک اہم اجلاس توں خطاب کریندے آکھی ۔سپریم کورٹ دے شعبہ تعلقات عامہ توں جاری اعلامیے موجب، اجلاس وچ جسٹس محمد علی مظہر، چیئرمین نیشنل جوڈیشل آٹومیشن کمیٹی، سپریم کورٹ بار ایسوسی ایشن دے صدر ہارون الرشید، سینئر ایڈووکیٹ سید علی ظفر (بطور نمائندہ ایس سی بی اے)، سیکرٹری وزارت آئی ٹی و ٹیلی کمیونی کیشن ضرار ہاشم خان، چیئرمین پاکستان ڈیجیٹل اتھارٹی ڈاکٹر سہیل منیر، رجسٹرار سپریم کورٹ سہیل لغاری، ڈائریکٹر جنرل (ریفارمز) فخر زمان، سیکرٹری لاء اینڈ جسٹس کمیشن سیدہ تنزیلہ صباحت سودھے وزارت آئی ٹی اتے سپریم کورٹ دے سینئر افسراں شرکت کیتی۔چیف جسٹس یحییٰ آفریدی آکھیا جو نیشنل جوڈیشل پالیسی میکنگ کمیٹی (این جے پی ایم سی) ایں اصلاحاتی عمل دی قیادت کریسی جݙاں جو سارے متعلقہ اداریں اتے فریقین کوں ایں وچ شامل کیتا ویسی تاں جو اے اصلاحات جامع اتے پائیدار ہوون۔ وزارت آئی ٹی دے سیکرٹری اجلاس کوں بریفنگ ݙیندے حکومت دے ایں عزم دا اعادہ کیتا جو عدالتی نظام کوں جدید ٹیکنالوجی نال ہم آہنگ کیتا ویسی۔ چیئرمین پاکستان ڈیجیٹل اتھارٹی ڈیٹا گورننس اتے سائبر سکیورٹی دے حوالے نال تفصیلات پیش کیتیاں اتے ݙسایا جو وفاقی حکومت اپݨے نیشنل ڈیجیٹل ماسٹر پلان دے تحت نو (9) شعبیں کوں ترجیح ݙتی اے جنہاں وچ قانون و انصاف دا شعبہ وی شامل اے۔چیف جسٹس ہدایت ݙتی جو فیڈرل جوڈیشل اکیڈمی، پاکستان ڈیجیٹل اتھارٹی اتے ٻئے متعلقہ اداریں نال رَل تے فوکس گروپ ڈسکشنز دا انعقاد کرے تاں جو نظام دے ڈیزائن کوں عدالتی لوڑھ موجب ڈھالیا ونڄ سڳے. انہاں مشاورت دے بعد وزارت آئی ٹی ہک تفصیلی چیک لسٹ تیار کریسی جئیں وچ انفراسٹرکچر، کنیکٹیویٹی اتے ٻئے بنیادی تقاضیں دا جائزہ شامل ہوسی۔ چیف جسٹس ایں عزم دا اظہار کیتا جو اگست 2026ء تئیں پورے مُلک دیاں ساریاں عدالتاں سولر انرجی تے منتقل کر ݙِتیاں ویسن اتے انہاں کوں ای لائبریری، تریمتاں دے سہولت مراکز اتے صاف پاݨی ݙیوݨ جیھے سہولتاں نال آراستہ کیتا ویسی۔ انہاں آکھیا جو عدلیہ دا اڳلا وݙا سنگ میل مکمل طور تے رَلیا ہویا “ای کورٹ ایکو سسٹم” دا قیام اے، جیڑھا پورے مُلک دیاں عدالتاں کوں ہک محفوظ ڈیجیٹل پلیٹ فارم دے ذریعے جوڑیسی۔