اسلام آباد۔11نومبر(اے پی پی) سپریم کورٹ بار ایسوسی ایشن آف پاکستان (ایس سی بی اے پی) دے صدر ہارون الرشید، سیکرٹری ملک زاہد اسلم اعوان اتے ٻئے عہدیداران اسلام آباد دے علاقہ جی-11 وچ ضلعی عدالتاں دے ٻاہر تھیوݨ آلے خودکش دھماکے دی شدید مذمت کیتی اے۔ ایس سی بی اے پی دے اعلامیے موجب ایں افسوسناک واقعے وچ جاں بحق تھیوݨ آلیں وچ ایس سی بی اے پی دے …
سپریم کورٹ بار ایسوسی ایشن دی اسلام آباد وچ خودکش دھماکے دی مذمت، ذمہ واراں کوں انصاف دی کچاری اچ گھن آوݨ دا مطالبہ
مزید خبراں
اسلام آباد۔11نومبر(اے پی پی) سپریم کورٹ بار ایسوسی ایشن آف پاکستان (ایس سی بی اے پی) دے صدر ہارون الرشید، سیکرٹری ملک زاہد اسلم اعوان اتے ٻئے عہدیداران اسلام آباد دے علاقہ جی-11 وچ ضلعی عدالتاں دے ٻاہر تھیوݨ آلے خودکش دھماکے دی شدید مذمت کیتی اے۔ ایس سی بی اے پی دے اعلامیے موجب ایں افسوسناک واقعے وچ جاں بحق تھیوݨ آلیں وچ ایس سی بی اے پی دے رُکن ایڈووکیٹ زبیر اسلم گھمن ولد چوہدری محمد اسلم گھمن (سابق ایڈیشنل سیکرٹری) وی شامل ہِن۔سپریم کورٹ بار دے صدر، سیکرٹری اتے کابینہ ارکان زبیر اسلم گھمن ایڈووکیٹ اتے ٻئے شہداء دے اہلِ خانہ نال دلی ہمدردی اتے تعزیت دا اظہار کریندے آکھیا جو اے واقعہ دہشت گردی دی ہک انتہائی بزدلانہ اتے افسوسناک کارروائی اے جئیں پوری وکلاء برادری اتے قوم کوں ݙکھی کر ݙِتے۔صدر ہارون الرشید آکھیا جو وفاقی دارالحکومت دے دل وچ ایں طرح دا خودکش حملہ نہ صرف وکلاء برادری بلکہ عام شہریاں دے تحفظ دے حوالے نال وی سنگین خدشے پیدا کریندے۔ انہاں آکھیا جو دہشت گردی دے خلاف سکیورٹی فورسز دیاں قربانیاں قابل تحسین ہِن پرایجھے عناصر کوں قانون دی کچاری اچ گھن آوݨ ضروری اے جیڑھے مُلک دے امن کوں تباہ کرݨ اتے خوف کھنڈاوݨ دی کوشش کریندِن۔ سپریم کورٹ بار ایسوسی ایشن مطالبہ کیتا جو ایں وحشیانہ فعل دے ذمہ واراں کوں وقتی انصاف دی کچاری اچ گھن آیا ونڄے تے وفاقی حکومت و قانون نافذ کرݨ آلے ادارے وکلاء برادری سودھے عام شہریاں دے تحفظ کیتے موثراتے پائیدار اقدامات کرن تاں جو اڳوں افسوسناک واقعے روکیے ونڄ سڳن ۔اعلامیہ دے چھیکڑ وچ سپریم کورٹ بار ایسوسی ایشن شہداء دے اہلِ خانہ نال دلی تعزیت کریندے سکیورٹی فورسز دے نال مکمل یکجہتی دا اظہار کیتا اتے مُلک وچ امن و استحکام دے قیام کیتے اپݨے عزم دا اعادہ کیتا۔
