اپوزیشن حکومت دے نال گالھ مہاڑ کیتے میز تے آوے، اونکوں مکمل معاونت فراہم کریسوں، سپیکر قومی اسمبلی

اسلام آباد۔12نومبر (اے پی پی) سپیکر قومی اسمبلی سردار ایاز صادق اپوزیشن کوں پیشکش کیتی جو اوہ حکومت دے نال گالھ مہاڑ کیتے میز تے آوے اونکوں مکمل معاونت فراہم کریسوں، بانی پی ٹی آئی کوں میں ݙو واری شکست ݙتی اے، ایں ویلھے میݙے خلاف کوئی عذرداری نئیں۔ بدھ کوں قومی اسمبلی اچ محمود خان اچکزئی دے ریمارکس تے سپیکر آکھیا جو وزیر اعظم ایں ایوان اچ کھڑ تے مذاکرات دی ولا ولا پیشکش کیتی اے، وزیر قانون گالھ مہاڑ آلے پاسے آوݨ دا آکھیے۔ میں بطور سپیکر حکومت اتے اپوزیشن وچال ثالثی کیتے تیار ہاں۔ حکومت اتے اپوزیشن کوں ہک میز تے گھن آوݨ میݙی ذمہ واری اے۔ جݙاں محمود خان اچکزئی آکھیا جو او عوام دے ووٹاں توں منتخب نئیں تھئے تاں ایں تے سپیکر آکھیا جو میں تہاݙے لیڈر کوں ݙو واری ہرائے، میݙے خلاف ایں الیکشن اچ کوئی عذرداری کائنی ، ایں قسم دی گالھیں کرݨ مذاکرات توں ٻھجݨ اے، اگر انڈیا نال گالھ تھی سڳدی اے تاں اساں آپت اچ گالھ کیوں نئیں کر سڳدے۔