ثالثی عدالت دی سندھ طاس معاہدے دے تناظر اچ بھارت دے خلاف پاکستان دی درخواست تے ثالثی دے بعض پہلواں تے مفید وضاحت، ترجمان دفتر خارجہ دا بیان

اسلام آباد۔12نومبر (اے پی پی) ترجمان دفتر خارجہ آکھیا جو پاکستان سندھ طاس معاہدہ دی دفعات دے تحت بھارت دے خلاف پاکستان ولّوں شروع کیتی ڳئی ثالثی دے تناظر اچ ثالثی عدالت دے اڄوکے فیصلے دا نوٹس گھدے جئیں اچ عدالت دے 8 اگست 2025 دے “ایوارڈ آن ایشوز آف جنرل انٹرپریٹیشن آف دی انڈس واٹر ٹریٹی” دے ثالثی دے کڄھ پہلوواں تے مفید وضاحت پیش کیتی ڳئی اے۔ بدھ کوں ترجمان دفتر خارجہ ولّوں جاری بیان اچ آکھیا ڳیا جو پاکستان ایں فیصلے دے متوازی طور تے جاری کیتے ڳئے پروسیجرل آرڈر دا وی نوٹس گھدے جیڑھا ایں گالھ دی توثیق کریندے جو عدالت مرحلہ وار انہاں کارروائیاں کوں جاری رکھیسی اتے سندھ طاس معاہدہ دے آرٹیکل IX اتے ایں دے نال ضمنی دستاویز ایف دے تحت غیر جانبدار ماہر دے سامݨے تھیوݨ آلی کارروائی کوں مدنظر رکھیسی۔ ترجمان آکھیا جو غیر جانبدار ماہرین دی کارروائی بھارت دی درخواست تے شروع کیتی ڳئی ہئی جئیں دا اڳلا مرحلہ ویانا اچ شیڈول دے تحت 17 توں 21 نومبر تئیں تھیوݨے، پر بھارت آپݨی شرکت روکݨ دا فیصلہ کیتے۔ پاکستان نیک نیتی نال غیر جانبدار ماہرین دی کارروائی اچ مکمل طور تے شرکت جاری رکھی ہوئی اے۔ ایں حوالے نال نیوٹرل ایکسپرٹ فیصلہ ݙِتے جو بھارت دی غیر حاضری اڳوں ودھݨ آلی کارروائی اچ رکاوٹ نئیں بݨ سڳدی۔