چیئرمین سینیٹ سید یوسف رضا گیلانی دی بارباڈوس تے روس دے پارلیمانی وفود نال ملاقاتاں، آپسی دلچسپی دے معاملیاں اتے ݙوپاسہ تعلقات دے ودھارے بارے گالھ مہاڑ کیتی

اسلام آباد۔12نومبر (اے پی پی) چیئرمین سینیٹ تے بانی چیئرمین بین الپارلیمانی سپیکرز کانفرنس سید یوسف رضا گیلانی نال بارباڈوس اتے روس دے پارلیمانی وفود انڄ انڄ ملاقاتاں کیتی جئیں اچ آپسی دلچسپی دے معاملیاں، ݙوپاسہ تعلقات اتے عالمی سطح تے پارلیمانی تعاون کوں ودھاوݨ دے امکانات بارے گالھ مہاڑ کیتی ڳئی۔ سینیٹ سیکرٹریٹ توں جاری بیان موجب چیئرمین سید یوسف رضا گیلانی وفود نال گالھ مہاڑ اچ ایں گالھ تے زور ݙِتّا جو عالمی امن، سلامتی اتے پائیدار ترقی کیتے پارلیمانی اداریاں کوں سانجھی کوششاں کرݨی ہوسن۔ انہاں آکھیا جو بین الپارلیمانی تعاون نہ صرف قوماں وچال آپسی اعتماد کوں ودھیندے بلکہ عالمی چیلنجز دے حل اچ وی اہم کردار ادا کریندے۔ روسی اتے بارباڈوس دے پارلیمانی رہنماواں چیئرمین سینیٹ کوں بین الپارلیمانی سپیکرز کانفرنس دے کامیاب انعقاد تے مبارکباد پیش کیتی اتے ایں تاریخی ایونٹ دے شاندار انتظامات تے سینیٹ سیکرٹریٹ دی کوششاں کوں سراہیا۔ وفود ایں عزم دا اظہار کیتا جو پاکستان دے نال پارلیمانی سطح تے تعاون اتے ادارہ جاتی میل جول کوں ٻیا مضبوط بݨایا ویسی۔ چیئرمین سینیٹ وی ݙوہیں ملکاں دے نال پارلیمانی تعلقات کوں ٻیا ودھاوݨ دا عزم کیتا۔