27ویں آئینی ترمیم اگر اج ٹیبل تھیسی تاں ضرور پاس تھیسی، پاک فوج وانا اچ 500 توں ودھ طلبہ کوں ریسکیو کیتا، اے تاریخی آپریشن دنیا یاد رکھیسی، عطاء اللہ تارڑ

اسلام آباد۔12نومبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو اج اگر 27ویں آئینی ترمیم ٹیبل تھیسی تاں ضرور پاس تھیسی، پاک فوج وانا اچ 500 توں ودھ طلبہ کوں ریسکیو کیتا، اے تاریخی آپریشن دنیا یاد رکھیسی۔ بدھ کوں پارلیمنٹ ہاؤس دے ٻاہر میڈیا نال گالھ مہاڑ کریندیں ہوئیں وفاقی وزیر اطلاعات آکھیا جو اگر اج 27ویں آئینی ترمیم ٹیبل تھیسی تاں ضرور منظور تھیسی، کاش اپوزیشن ایں تے سیر حاصل گالھ مہاڑ کریندی اتے شق وار بحث اچ حصہ گھندی۔ انہاں آکھیا جو بل پڑھے بغیر شور و غل کرݨ اتے بیانیہ بݨاوݨ نال کوئی فائدہ حاصل نہ تھیسی۔ ہک سوال دے جواب اچ وفاقی وزیر اطلاعات آکھیا جو وانا اچ پاک فوج 500 توں ودھ طلباء کوں بازیاب کیتا، پاک فوج دا اے تاریخی آپریشن ہا جئیں تے پاک فوج کوں خراج تحسین پیش کریندوں۔ انہاں آکھیا جو پاک فوج دے ایں تاریخی آپریشن کوں دنیا یاد رکھیسی۔ وانا آپریشن دنیا دی ملٹری اکیڈمیاں اچ پڑھایا ویسی۔ وفاقی وزیر آکھیا جو دشمن کوں سنیھا اے جو پاکستان آپݨے توں چار گُݨا وݙے دشمن کوں شکست ݙتی اے، دشمن مورچے چھوڑ تے ٻھج ڳیا ہا، اے پراکسی جنگ تاں اساݙے کیتے کوئی مسئلہ ای نئیں ، دشمن کوں ہر محاذ تے شکست ݙیسوں۔ صحافی دے سوال جو کیا مسلم لیگ (ن) دے قائد محمد نواز شریف اج پارلیمنٹ ہاؤس آندے پئِن، تے وفاقی وزیر اطلاعات جواب ݙِتّا جو تہاݙی وی ملاقات کرا ݙیسوں۔