پاکستان کینیڈا دے نال تعلقات کوں ٻیا مضبوط بݨاوݨ چاہندے، وزیراعظم شہباز شریف دی کینیڈین ہائی کمشنر طارق علی خان نال گالھ مہاڑ

اسلام آباد۔12نومبر (اے پی پی) وزیراعظم محمد شہباز شریف آکھیا جو پاکستان کینیڈا دے نال تعلقات کوں ٻیا مضبوط بݨاوݨ چاہندے، پاکستان اچ کان کنی اتے معدنیات دے شعبے اچ سرمایہ کاری دے وسیع موقعے موجود ہِن، بیرک گولڈ پاکستان دے کان کنی دے شعبے اچ ترقی دا راہ سوکھا کرݨ دے نال نال پاکستان اتے کینیڈا وچال اقتصادی تعاون دی کامیابی دی سند ثابت تھیسی۔ بدھ کوں وزیراعظم آفس دے میڈیا ونگ توں جاری بیان موجب اے ڳالھیں انہاں کینیڈا دے پاکستان اچ تعینات تھیوݨ آلے ہائی کمشنر طارق علی خان نال گالھ مہاڑ کریندیں ہوئیں کیتی جنہاں وزیراعظم نال ملاقات کیتی۔ ایں موقع تے معاون خصوصی طارق فاطمی اتے سیکرٹری خارجہ وی موجود ہن۔ وزیراعظم کینیڈین ہائی کمشنر کوں تقرری تے مبارکباد ݙتی اتے ایں اعتماد دا اظہار کیتا جو انہاں دی تعیناتی دے دوران پاکستان اتے کینیڈا وچال دیرینہ اتے دوستانہ تعلقات ٻئے مضبوط تھیسن۔ انہاں کینیڈین قیادت کیتے خیر سگالی دا سنیھا وی ݙِتّا۔ وزیراعظم آکھیا جو پاکستان کینیڈا دے نال تعلقات دی ٻئی مضبوطی دا خواہشمند اے۔ وزیر اعظم آکھیا جو پاکستان اچ کان کنی اتے معدنیات دے شعبے اچ سرمایہ کاری دے وسیع موقع موجود ہِن۔ ریکوڈک منصوبے دا ذکر کریندیں ہوئیں وزیرِ اعظم آکھیا جو بیرک گولڈ پاکستان دے کان کنی دے شعبے اچ ترقی دا راہ سوکھا کرݨ دے نال نال پاکستان اتے کینیڈا اقتصادی تعاون دی کامیابی دی سند ثابت تھیسی۔ کینیڈین ہائی کمشنر وزیراعظم دا شکریہ ادا کیتا اتے پاکستان اتے کینیڈا دے ݙوپاسہ تعلقات خاص طور تے زراعت، توانائی، تجارت، سرمایہ کاری، ٹیکنالوجی، تعلیم اتے عوامی تبادلیاں کوں ٻیا ودھاوݨ کیتے کم کرݨ دے عزم دا اظہار کیتا۔ وزیراعظم کینیڈا اچ رہݨ آلے پاکستانیاں دے کینیڈا دی تعمیر و ترقی اچ قیمتی کردار کوں سراہیا جیڑھا ݙوہیں ملکاں وچال تعلقات دی مضبوطی کیتے پُل دا کردار ادا کریندِن۔