وزیراعظم محمد شہباز شریف دی قیادت اچ نویں صنعتی پالیسی پاکستان دی معاشی خودمختاری دی ضمانت بݨسی، معاونِ خصوصی برائے صنعت تے پیداوار ہارون اختر خان

اسلام آباد۔12نومبر (اے پی پی) وزیراعظم دے معاونِ خصوصی برائے صنعت تے پیداوار ہارون اختر خان آکھیا جو وزیراعظم محمد شہباز شریف دی قیادت اچ نویں صنعتی پالیسی پاکستان دی معاشی خودمختاری دی ضمانت بݨسی۔ بدھ کوں پاکستان پراسپیریٹی فورم اچ آپݨے خطاب اچ انہاں آکھیا جو پاکستان اڄ آپݨی معاشی تاریخ دے ہک اہم موڑ تے کھڑے۔ اساں وقتی اقدامات نئیں بلکہ دیرپا معاشی اصلاحات تے یقین رکھیندوں۔ ہارون اختر خان آکھیا جو اقتصادی استحکام کہیں اتفاق دا نتیجہ نئیں بلکہ مستقل مزاجی، قابلیت اتے واضح وژن نال ملدے۔ انہاں آکھیا جو نویں قومی ٹیرف پالیسی تحفظ پسندی توں مقابلہ جاتی معیشت دی ول ہک وݙا قدم اے، جئیں دے تحت اڳوں آوݨ آلے پنج سالاں اچ ڈیوٹی اسلاب کوں چار سطحاں تئیں محدود کیتا ویسی۔ انہاں آکھیا جو ٹیرف پالیسی دے نفاذ نال صنعتاں کوں 175 ارب روپے دی لاگت اچ بچت متوقع اے، جڈاں جو ریگولیٹری گلوٹین اصلاحات دے نتیجے اچ کاروباری لاگت اچ سالانہ 250 ارب روپے دی گھٹکی تھئی اے۔ مُلک بھر اچ 465 ریگولیٹری اصلاحات دے ذریعے لائسنسنگ اتے منظوری دے عمل کوں سوکھا بݨایا ڳئے۔ ہارون اختر خان ٻیا آکھیا جو “آسان کاروبار ایکٹ 2025” انہاں اصلاحات دا قانونی ستون ثابت تھیسی، جڈاں جو قومی صنعتی پالیسی 2025 پاکستان دی معاشی بحالی دا نیلا خاکہ اے۔ انہاں آکھیا جو وزیراعظم شہباز شریف دی قیادت اچ نویں صنعتی پالیسی پاکستان دی معاشی خودمختاری دی ضمانت بݨسی۔ہارون اختر خان آکھیا جو نویں صنعتی پالیسی دا مقصد پیداواریت، شفافیت اتے جدیدیت کوں ودھاوݨ اے۔ ٹیرف، ٹیکس اتے توانائی دے شعبیاں اچ وݙی سطح تے اصلاحات جاری ہِن۔ انہاں آکھیا جو الیکٹرک وہیکل پالیسی گرین انڈسٹری دے ودھارے اچ سنگِ میل ثابت تھیسی، اتے ہائی ٹیک تے گرین فیلڈ صنعتاں کوں خصوصی رعایتی ٹیرف فراہم کیتا ویسی۔ اکیہویں صدی دی مسابقت دا انحصار جدت، شفافیت اتے گرین ٹیکنالوجی تے اے۔ حکومت، نجی شعبہ اتے تعلیمی ادارے رَل تے پاکستان کوں خوشحالی دے راہ تے گامزن کریسن۔ خوشحالی دا پندھ اوکھا ضرور اے پر ممکن اے، بہترین ویلھا ہݨ اے۔