ڈبلیو ایچ او دے مشن دی وفاقی وزیر صحت مصطفیٰ کمال نال ملاقات، ڈبلیو ایچ او لیول-تھری دے حصول دے اقدامات دا تفصیلی جائزہ

اسلام آباد۔12نومبر (اے پی پی) عالمی ادارہ صحت (ڈبلیو ایچ او) دے مشن وفاقی وزیر صحت مصطفیٰ کمال نال ملاقات کیتی، جئیں اچ پاکستان کیتے ڈبلیو ایچ او لیول-تھری دے حصول دے اقدامات دا تفصیلی جائزہ گھیدا ڳیا۔ اجلاس اچ ڈبلیو ایچ او دے کنسلٹنٹ، اسپیشل سیکرٹری صحت اتے چیف ایگزیکٹو آفیسر ڈریپ وی شریک ہن۔ ایں موقع تے ڈبلیو ایچ او ولّوں میڈیکل پروڈکٹس دے معیار اچ بہتری اتے انہاں کوں بین الاقوامی معیار دے مطابق بݨاوݨ کیتے کئی سفارشاں پیش کیتی ڳئی۔ وفاقی وزیر صحت مصطفیٰ کمال آکھیا جو ڈبلیو ایچ او دے ماہراں دی سفارشاں تے مکمل عملدرآمد کیتا ویسی تاںجو پاکستان عالمی سطح تے صحت دے معیار کوں ٻیا بہتر بݨا سڳے. انہاں ٻیا آکھیا جو انہاں سفارشاں تے پیش رفت کیتے جلدی سارے صوبیاں دا ہک مشاورتی اجلاس سݙیا ویسی۔ وزیر صحت ݙسایا جو ڈبلیو ایچ او لیول تھری دے حصول دے بعد پاکستان آپݨی دوائیاں 68 ملکاں اچ برآمد کرݨ دے قابل تھی ویسی، جیڑھا ملکی معیشت کیتے ہک وݙا سنگِ میل ثابت تھیسی۔ مصطفیٰ کمال آکھیا جو حکومت دوائیاں دی برآمدات اچ اضافے اتے صحت دے شعبے اچ بہتری کیتے پکے ارادے نال اے۔ انہاں یقین ظاہر کیتا جو ڈبلیو ایچ او پاکستان جلدی توں جلدی لیول تھری دا ہدف حاصل کریسی۔