پاکستان دی خارجہ پالیسی اقوام متحدہ دے چارٹر دے اصولاں موجب خود مختار مساوات، تنازعیاں دے پُرامن حل، عدم مداخلت اتے قوماں وچال دوستانہ تعلقات تے مبنی اے، نائب وزیر اعظم تے وزیر خارجہ سینیٹر محمد اسحاق ڈار دا بین الپارلیمانی سپیکرز کانفرنس توں خطاب

اسلام آباد۔12نومبر (اے پی پی) نائب وزیر اعظم تے وزیر خارجہ سینیٹر محمد اسحاق ڈار امن، استحکام اتے ترقی کوں یقینی بݨاوݨ کیتے مذاکرات، سفارت کاری اتے کثیرالجہتی تعاون دے پاکستان دے غیر متزلزل عزم دا اعادہ کریندیں ہوئیں آکھیا جو پاکستان دی خارجہ پالیسی اقوام متحدہ دے چارٹر دے اصولاں یعنی خود مختار مساوات، تنازعیاں دے پُرامن حل، عدم مداخلت اتے قوماں وچال دوستانہ تعلقات تے مبنی اے۔ اے ڳالھیں انہاں بدھ کوں اتھاں بین الپارلیمانی سپیکرز کانفرنس توں خطاب کریندیں ہوئیں آکھی۔ انہاں علاقائی تعاون، تنازعیاں دی روک تھام اتے مساوی ترقی کیتے پاکستان دی مسلسل وکالت دا ذکر کریندیں ہوئیں آکھیا جو استحکام اتے ترقی کیتے گالھ مہاڑ ہمیشہ توں اساݙا ترجیحی ذریعہ رہیے۔ انہاں دنیا بھر توں آئے ہوئے اراکین پارلیمنٹ، مندوبین اتے شرکاء نال خطاب کریندیں ہوئیں آکھیا جو انہاں دی موجودگی ایں سانجھے یقین دی عکاسی کریندی اے جو قوماں وچال تعاون امن اتے ترقی دا ساریاں توں یقینی راہ اے۔ انہاں آکھیا جو چیئرمین سینیٹ اتے بین الپارلیمانی سپیکرز کانفرنس دے بانی چیئرمین سینیٹر سید یوسف رضا گیلانی دے وژن دے مطابق سینیٹ آف پاکستان دے تحت تھیوݨ آلی کانفرنس کثیرالجہتی تعاون دے ذریعے امن، سلامتی اتے ترقی کوں اڳوں ودھاوݨ کیتے پاکستان دی مسلسل کوششاں اچ ہک ٻیا سنگ میل اے۔ نائب وزیر اعظم آکھیا جو بین الاقوامی سطح تے پاکستان دے پندھ دی تعریف ہمیشہ ریزیلینس، مکالمے اتے شراکت داری نال تھیندی اے، بین الپارلیمانی سپیکرز کانفرنس انہاں اصولاں کوں ٹھوس نتیجیاں اچ بدلݨ کیتے ہک منفرد پلیٹ فارم فراہم کیتے جیڑھا علاقائی استحکام کوں مضبوط کریندے ۔ انہاں آکھیا جو اج سفارت کاری وزارتاں اتے روایتی مشناں توں اڳوں ودھ ڳئی اے، عوامی بیداری اتے پارلیمانی مشغولیت نال تقویت مِلدی اے۔ نائب وزیر اعظم آکھیا جو پارلیمانی سفارت کاری عوامی نمائندیاں دے نقطہ نظر کوں بین الاقوامی گالھ مہاڑ اچ گھن آ تے روایتی سفارت کاری دی تکمیل کریندی اے۔ انہاں آکھیا جو ایں طرحاں دے تعاملات عالمی تعاون کوں مضبوط کریندن اتے ایں گالھ کوں یقینی بݨیندن جو سفارت کاری دنیا بھر دے شہریاں دی اُمیداں اتے دلچسپی کوں نشابر کریندی اے۔ نائب وزیر اعظم آکھیا جو علاقائی میل جول، تجارتی سوکھ اتے سرمایہ کاری دی شراکت داری دے ذریعے معیشتاں سانجھی خوشحالی حاصل کر سڳدِن۔ جاری عالمی چیلنجز دا ذکر کریندیں ہوئیں انہاں آکھیا جو دنیا تبدیلی دے ایجھے دور دا مشاہدہ کریندی پئی اے جئیں اچ کثیرالجہتی اداریاں تے اعتماد اچ  ودھدی ہوئی جغرافیائی سیاسی دشمنیاں، موسمیاتی بحران، دہشت گردی اتے ودھدی ہوئی غیر مساوات دی نشاندہی کیتی ڳئی اے، ایں صورتحال اچ ایں طرحاں دے فورمز غیر معمولی اہمیت رکھیندِن۔ نائب وزیر اعظم آکھیا جو کثیرالجہتی تعاون کوں نہ صرف محفوظ کیتا ونجݨا چاہیدے بلکہ کھلے پن، شمولیت اتے عوامی نمائندیاں دی فعال شرکت دے ذریعے اونکوں زندہ کیتا ونجݨا چاہیدے۔ انہاں آکھیا جو ایں سال دی تھیم “امن، سلامتی اتے ترقی” ہک سوکھی پر طاقتور سچائی تے زور ݙیندی اے جو امن ترقی کوں ممکن بݨیندے، ترقی امن کوں برقرار رکھیندی اے اتے سلامتی ترقی کوں مضبوط کریندی اے۔ انہاں ایں گالھ تے زور ݙِتّا جو اداریاں کوں جوابدہ اتے جامع ہووݨا چاہیدے تاںجو امن اتے ترقی دے فیدے سارے لوکاں تئیں پڄ سڳن۔