سپیکر قومی اسمبلی دی تاجکستان پارلیمنٹ دے ڈپٹی سپیکر عزیز گیوزودا نال ملاقات

اسلام آباد۔12نومبر (اے پی پی) سپیکر قومی اسمبلی سردار ایاز صادق نال بدھ کوں تاجکستان پارلیمنٹ دے ڈپٹی سپیکر عزیز گیوزودا ملاقات کیتی جئیں اچ ݙوپاسہ تعلقات، پارلیمانی تعاون اتے مختلف شعبیاں اچ آپسی دلچسپی دے معاملیاں تے تفصیلی گالھ مہاڑ کیتی ڳئی۔ ایں موقع تے گالھ مہاڑ کریندیں ہوئیں سپیکر سردار ایاز صادق آکھیا جو پاکستان اتے تاجکستان وچال تاریخی، مذہبی اتے ثقافتی رشتے بھائی چارے دی مضبوط بنیاد ہِن۔ پاکستان تاجکستان کوں ہک نیڑے دا اتے بھرا اسلامی مُلک سمجھدے۔ انہاں آکھیا جو پارلیمانی میل جول کوں ٻیا مضبوط بݨا تے آپسی اعتماد اتے تعاون کوں نویں اُچائیاں تئیں گھن آیا ونڄ سڳدے۔ سپیکر سردار ایاز صادق تاجکستان دے نال ثقافتی، تعلیمی اتے تجارتی تعاون کوں ودھاوݨ دی لوڑھ تے زور ݙِتّا اتے آکھیا جو پاکستان تاجکستان دا ݙوجھا گھر اے، تاجکستان طویل جنگ دا سامݨا کیتے، اساڈا ہدف علاقائی استحکام تعاون کوں ودھاوݨ اے۔ ݙوہیں رہنماواں خطے اچ امن، استحکام اتے ترقی کیتے سانجھی کوششاں تے اتفاق کیتا۔ ڈپٹی سپیکر تاجکستان آکھیا جو پاکستان اتے تاجکستان سانجھے مذہب، روایت اتے ثقافت دے مضبوط رشتیاں اچ بݨّیے ہوئِن۔ انہاں آکھیا جو پاکستان دے گلگت بلتستان، ہنزہ اتے چترال دی ثقافت تاجکستان نال ملدی اے۔ امن، تحفظ اتے ترقی اساں ساریاں دا سانجھا مقصد اے۔ ملاقات اچ ڈپٹی سپیکر قومی اسمبلی سید غلام مصطفیٰ شاہ وی شریک ہن۔