آرمی چیف فیلڈ مارشل عاصم منیرکیڈٹ کالج وانا وچ لمحہ بہ لمحہ آپریشن تے نظر رکھی، قوم دے اے معمار اساݙا سرمایہ ہِن، ہرگز کوئی آنچ نہ آوݨ ݙتی ونڄے، فیلڈ مارشل عاصم منیر دی ہدایت

اسلام آباد ۔12نومبر(اے پی پی) چیف آف آرمی سٹاف فیلڈ مارشل عاصم منیر کیڈٹ کالج وانا وچ لمحہ بہ لمحہ آپریشن تے نظر رکھی، فیلڈ مارشل عاصم منیر ہدایت کیتی جو قوم دے اے معمار اساݙا سرمایہ ہِن، ہرگز کوئی آنچ نہ آوݨ ݙتی ونڄے۔ ذرائع موجب کیڈٹ کالج وانا دے استاد اتے کیڈٹس دے حوصلے اُچے ہِن اتے انہاں دہشت گردی دے خلاف سیسہ پلائی دیوار دا عزم ظاہر کیتے۔آپریشن کمانڈر کرنل محمد طاہر جئیں افغان خوارج دا کیڈٹ کالج وانا تے حملہ ناکام بݨایا، انہاں آکھیا جو 10 نومبر کوں 5افغانی خوارج کیڈٹ کالج وانا تے حملہ کر ݙتا، خوارج وانا کیڈٹ کالج کوں، جیڑھا جو پاک فوج ولّوں ساؤتھ وزیرستان دی عوام کیتے ہک قیمتی تحفہ اے، نشانہ بݨاوݨ دی کوشش کیتی ڳئی۔ کرنل محمد طاہر آکھیا جو ہک خود کش حملہ آور دھماکہ کیتا جݙاں جو ٻئے خوارج گیٹ وچ داخل تھیوݨ دی کوشش کیتی، خوارج پہلے زیرتعلیم ٻالاں کوں یرغمال بݨاوݨ دی کوشش کیتی، سکیورٹی فورسز دی وقتی کارروائی خوارج دے ایں حملے اتے خراب ارادیں کوں ناکام بݨا ݙِتا، اساں دہشت گرداں کوں مخصوص بلاک وچ محدود کرتے طالب علم دی حفاظت کوں یقینی بݨایا۔ انہاں آکھیا جو رات 10 توں ساڈھے 10 وڄے دے نیڑے خوارج دے خلاف بھرپور آپریشن دے بعد سارے خوارج کوں مارݙِتا ڳیا۔ وانا کالج وچ زیر تعلیم کیڈٹ آکھیا جو اساں عصر دے ویلھے ڈرل کمپٹیشن دی تیاری کریندے پئے ہاسے جو خود کش دھماکہ تھیا، اساں کوں پتہ لڳیا جو حملہ تعلیم دے دشمن کیتے جیڑھا اساکوں تعلیم توں روکݨ چاہندن، پاک فوج دے جواناں اساں کوں محفوظ طریقے نال کالج توں محفوظ مقام تے منتقل کیتا، تعلیم دے دشمن کجھ وی کرگھنن اساں کوں تعلیم توں نی روڳ سڳدے۔