پاکستان کہیں وی قسم دی دہشت گردی کوں برداشت نہ کریسی، بیرسٹر دانیال چوہدری

راولپنڈی۔12نومبر(اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری آکھیے جو پاکستان کہیں وی قسم دی دہشت گردی کوں برداشت نہ کریسی اتے دہشت گردانہ کارروائیاں دا بھرپور اتے موثر جواب ݙِتا ویسی، جیڑھے عناصر ٻاہرلی مدد یا پراکسیز دے ذریعے پاکستان کوں غیر مستحکم کرݨ دی کوشش کریندے پئن انہاں کوں منہ بھن جواب ݙِتا ویسی۔ اے ڳالھ انہاں گزریل ݙینھ لیاقت باغ اسپورٹس کمپلیکس وچ نویں سوئمنگ پول اتے کھݙاریاں دے ہاسٹل دے افتتاح دے موقع آکھی۔انہاں آکھیا جو حکومت پنجاب وزیراعلیٰ مریم نواز دی ہدایت تے نینگراں کیتے صحت مند سرگرمیاں دے موقع ودھیندی پئی اے۔ ایں سلسلے وچ جدید سہولتاں نال بھریا ہویا سوئمنگ پول اتے ہاسٹل دا قیام راولپنڈی دے کھݙاریاں کیتے قیمتی سرمایہ ثابت تھیسی۔ انہاں آکھیا جو پہلی واری ایں کمپلیکس وچ کھݙاریاں دے رہݨ کیتے ہاسٹل بݨایا ڳئے جئیں نال قومی و بین الاقوامی ٹیماں دی میزبانی ممکن ہوسی اتے ایونٹس دے دوران خرچے وچ وی گھٹکی آسی۔ انہاں ݙسایا جو وزیراعلیٰ پنجاب دی خصوصی ہدایت تے زنانیاں کیتے انڄ جم بݨایا ڳئے۔دانیال چوہدری آکھیا جو مسلم لیگ (ن) ہمیشہ راولپنڈی دی ترقی وچ اڳوں رہی اے۔ انہاں آکھیا جو ملکی حالات جݙاں خراب ہن اتے مُلک ڈیفالٹ دے خطرے نال ݙوچار ہئی، تاں وزیراعظم شہباز شریف اتے فیلڈ مارشل سید عاصم منیر دی انتھک محنت اتے جذبے پاروں پاکستان ہک واری ول ترقی اتے استحکام دے رستے تے گامزن تھئے۔ اڄوکی دہشت گردی دے واقعے تے افسوس کریندے ہوئیں انہاں آکھیا جو پاکستانی قوم متحد اے اتے ماضی وانڳوں دشمن دے ارادیں کوں ناکام بݨیندی رہسی۔