ستاویویں آئینی ترمیم دا مقصد گورننس اتے انصاف چنڳاں بݨاوݨ اے، پی ٹی آئی27ویں ترمیم کیتے کوئی تجویز پیش نی کیتی، انہاں اپݨے دور وچ آئین نال کھلواڑ کیتا، وفاقی وزیر اطلاعات و نشریات عطاء اللہ تارڑ

اسلام آباد۔12نومبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو ستاویویں آئینی ترمیم دا مقصد گورننس اتے انصاف کوں چنڳاں بݨاوݨ اے ، اے کئی ݙہاکیں دی سوچ اتے ڳالھ مہاڑ دا نتیجہ اے پرافسوس پی ٹی آئی دے نیڑے پاکستان توں زیادہ انہاں دا لیڈر اہم اے، اپوزیشن اپݨی یادداشت کھو چکی اے، انہاں دے سارے حالات و واقعات 2022 توں پچھوں نی ویندے، اے حقائق کوں پچھوں سٹیندے پئن، پی ٹی آئی دے دور وچ آئین نال کھلواڑ کیتا ڳیا، جݙاں قاسم سوری آئین شکنی کریندے پئے ہن تاں اے کیوں چُپ ہن، پی ٹی آئی 27ویں ترمیم کیتے کوئی تجویز پیش نی کیتی، وانا وچ 500 توں ودھ کیڈٹس کوں محفوظ طریقے نال بازیاب کرایا ڳئے، کیا کہیں پی ٹی آئی آلے وانا کیڈٹ کالج حملے تے مذمتی بیان ݙِتا، اساݙی اپوزیشن صرف ٹک ٹاک، یو ٹیوب اتے فیس بک دی سیاست کریندی پئی اے۔ اے ڳالھ انہاں قومی اسمبلی دے اجلاس وچ آکھی اے۔وزیر اطلاعات و نشریات آکھیا جو اپوزیشن دیاں ساریاں تقریراں سُݨ تے اے گمان تھیا جو او اپݨی یادداشت کھو چکی اے، انہاں دے سارے حالات و واقعات 2022 توں پچھوں نی ویندے، اے حقائق کوں پچھوں سٹیندے پئن، جݙاں اے پارلیمان مشاورت اتے سیاسی عمل دے تحت آئینی ترمیم کرݨ ویندی پئی اے تاں اے انہاں توں برداشت نی تھیندا پیا۔ انہاں آکھیا جو پی ٹی آئی دے دور حکومت وچ آئین نال کھلواڑ کیتا ڳیا، قاسم خان سوری آئین کوں پامال کیتا، پارلیمنٹ کوں بھنیا ایں ویلھے اے کیوں چُپ ہن۔عطاء اللہ تارڑ آکھیا جو اے سیاسی لوک کائںی ، کیا انہاں آئین تے شق وار کوئی تجویزاں ݙِتِن۔ انہاں آکھیا جو کاش اساکوں سیاسی اپوزیشن مِلدی، انہاں دی سوچ 2020 توں پہلے نی ویندی۔ انہاں آکھیا جو اساں پیپلز پارٹی اتے ٻیاں جماعتاں نال چارٹر آف ڈیموکریسی کیتا جئیں دا مقصد افہام و تفہیم نال جمہوری عمل کوں تکڑا کرݨ ہئی ۔ انہاں آکھیا جو 2017 وچ اے چور دروازے دے ذریعے اقتدار وچ آئے، اڄ ایں تے وی انہاں کوں ایں ایوان وچ معافی منڳݨی چاہیدی اے۔عطاء اللہ تارڑ آکھیا جو انہاں کوں فارم 47 دی تاں ڳالھ ہی نی کرݨی چاہیدی کیونجو ایں ایوان وچ ایجھے لوک وی ٻیٹھن جنہاں کوں رزلٹ تاں پرے دی ڳالھ اپݨے گھر توں نکلݨ نی ݙِتا ڳیا ، کئی لوکاں دے پیارے دنیا توں وداع تھئے پر انہاں دے جنازے نی چاوݨ ݙِتے ڳئے۔ وفاقی وزیر اطلاعات و نشریات آکھیا جو پی ٹی آئی دے اندر کئی دھڑے ہِن۔انہاں محمود خان اچکزئی دی تقریر تے افسوس کیتا، انہاں ستاویویں ترمیم تے ڳالھ کریندے کابل دا ذکر کیتا، اے نویں روایت اے جو ایجھی ڳالھ کرو جیڑھی افغانستان اتے بھارت وچ ہیڈ لائن بݨے، انہاں دی تقریر دا خلاصہ کڈھو تاں ایں وچ کابل دے علاوہ کجھ کائںی۔ انہاں دا آکھݨا ہئی جو اپوزیشن وچ موجود کہیں شخص پارلیمینٹری سپریمیسی یا آئینی نظام دا مطالعہ نی کیتا، جے کیتا ہوندا تاں ݙسیندے جو مہذب ملکاں وچ ایگزیکٹو اتے لیجسلیٹر دا کیا کردار ہوندے۔وفاقی وزیراطلاعات آکھیا جو وانا دے اندر پنج سو توں ودھ طلباء کوں بازیاب کرایا ڳئے پر اپوزیشن ایں تے کوئی ڳالھ نی کیتی، انہاں دے لیڈر دے ایکس اکاؤنٹ تے غیر مُلکی شخصایت کیتے تعزیتی پیغام تاں آندن پر میجر عدنان جیھے شہداء تے ݙو لفظ وی نی آکھدے، غزہ دے مظلوماں تے خاموشی اختیار کریندن۔ انہاں آکھیا جو9 مئی دے واقعیں وچ انہاں دے لیڈر ریڈ لائنز کراس کرݨ دا حکم ݙِتا، شہداء دیاں یادگاراں ڈاھا ݙِتیاں ڳئیاں،دفاعی اداریں تے حملے تھئے، کورکمانڈر ہاؤس، ریڈیو پاکستان اتے ٻیاں عمارتاں تے حملے کیتے ڳئے، کارکناں کوں اُکسایا ڳیا پر بعد وچ انہاں دی کوئی خبر نہ ڳھدی ڳئی۔وفاقی وزیر آکھیا جو اپوزیشن ٻل نی پڑھیا، کہیں شق تے تجویز نی ݙِتی، کہیں کمیٹی وچ شرکت نی کیتی، انہاں دی سیاست صرف شور مچاوݨ اتے ویوز ودھاوݨ تئیں محدود اے، انہاں دی موریلیٹی 2022 دے بعد دی اے۔انہاں آکھیا جو مئی وچ جنگ دے بعد پاکستان دی دنیا بھر وچ عزت وچ ودھارا تھئے، اساں جتھاں ویندوں لوک پاکستان کوں قدر دی نگاہ نال ݙیکھدِن۔ انہاں آکھیا جو سعودی عرب دے نال سٹریٹجک میوچل ڈیفنس معاہدہ تھیا، اکنامک فریم ورک لانچ تھیا، ریاض شہر وچ25 کلو میٹر تئیں پاکستان دے جھنڈے لڳئے ݙکھالی ݙِتے اتے پاکستان دے ساوے پاسپورٹ کوں عزت اتے قدر دی نگاہ نال ݙٹھا ویندا پئے۔ انہاں دا آکھݨا ہئی جو صرف اکتوبر دے مہینے وچ پاکستان کوں3.4 ارب ڈالر دی ترسیلات آئیاں جیڑھی گزریل سال دے مقابلے وچ 11 فیصد ودھ ہِن، پی ٹی آئی ٻاہرلے مُلک پاکستانیاں کوں بائیکاٹ دی کال ݙتی ہئی جو پاکستان وچ ترسیلاتِ زر نہ بھیڄن پر انہاں دی ایں کال دے باوجود ترسیلات وچ ریکارڈ ودھارا تھیا۔وفاقی وزیر آکھیا جو ہݨ افغانستان دی سرزمین پاکستان دے خلاف استعمال نہ تھیوݨ ݙتی ویسی، وانا دے طلباء کوں جئیں جرات مندی نال بازیاب کرایا ڳئے ایں تے افسراں و جواناں کوں خراج تحسین پیش کرینداں۔