سپیکر قومی اسمبلی سردار ایاز صادق نال وفاقی جمہوریہ صومالیہ دے پارلیمانی وفد دی ملاقات

اسلام آباد۔12نومبر(اے پی پی) سپیکر قومی اسمبلی سردار ایاز صادق نال وفاقی جمہوریہ صومالیہ دے پارلیمانی وفد پارلیمنٹ ہاؤس وچ ملاقات کیتی۔ وفد دی قیادت نائب سپیکر “ہاؤس آف پیپلز” سعدیہ یاسین کیتی۔ ملاقات وچ پاک-صومالیہ تعلقات، پارلیمانی تعاون اتے سانجھی دلچسپی دے معاملیں تے ڳالھ مہاڑ کیتی ڳئی۔ سردار ایاز صادق وفد نال ڳالھ کریندے آکھیا جو پاکستان صومالیہ دے نال پراݨے دوستانہ تعلقات کوں قدر دی نگاہ نال ݙیکھدے، پاکستان صومالیہ وچ امن، استحکام اتے ترقی کیتے انہاں دیاں کوششاں دی مکمل حمایت کریندے۔ انہاں آکھیا جو پاکستانی ‘لُک افریقہ پالیسی’ دے تحت سارے افریقن ملکاں دے نال تعلقات کوں کھنڈاوݨ وچ پکے ارادے نال ہِن۔ انہاں صومالیہ دے نال تعلیم، تجارت، اتے پارلیمانی استعداد کار وچ تعاون ودھاوݨ دی لوڑھ تے زور ݙِتا۔صومالی نائب سپیکر آکھیا جو پاکستان مسلم دنیا وچ صومالیہ دا ہک بھروسے جوڳا شراکت دار اے۔ ملاقات وچ دہشت گردی دے خاتمے اتے انسانی ترقی جیھے چیلنجز تے وی ڳالھ مہاڑ کیتی ڳئی۔ ݙوہیں رہنماواں اسلامی ملکاں وچال اتحاد و یکجہتی ودھاوݨ تے اتفاق کیتا۔