سکیورٹی فورسز دا پنجگور وچ فتنہ الخوارج دے خلاف کامیاب آپریشن، چار خارجی دہشت گرد ہلاک

راولپنڈی۔ 27 دسمبر(اے پی پی) سکیورٹی فورسز بلوچستان دے ضلع پنجگور وچ خفیہ اطلاعات دی بنیاد تے کیتے ڳئے آپریشن دے دوران بھارتی پراکسی ‘فتنہ الخوارج’ نال تعلق رکھݨ آلے چار خارجی دہشت گرداں کوں ہلاک کر ݙتے۔ پاک فوج دے شعبہ تعلقاتِ عامہ (آئی ایس پی آر) توں جاری بیان موجب آپریشن دے دوران سکیورٹی فورسز خوارج دے ٹھکاݨے کوں مؤثر انداز نال نشانہ بݨایا، شدید فائرنگ دے تبادلے توں بعد چار خارجیاں کوں جہنم واصل کر ݙتا ڳیا۔ ہلاک تھیوݨ آلے دہشت گرداں دے قبضے توں اسلحہ، گولہ بارود تے دھماکہ خیز مواد وی برآمد کیتا ڳئے۔آئی ایس پی آرموجب علاقے وچ موجود کہیں وی ٻئے بھارتی حمایت یافتہ خوارج کوں مکاوݨ کیتے کلیئرنس تے سینیٹائزیشن آپریشنز جاری ہن۔ نیشنل ایکشن پلان دے تحت فیڈرل ایپکس کمیٹی دی منظوری نال شروع کیتے ڳئے ویژن ”عزمِ استحکام“ دے تحت سکیورٹی فورسز تے قانون نافذ کرݨ آلے اداریں دی بلا تعطل انسدادِ دہشت گردی مہم پوری رفتار نال جاری رہسی تاں جو ملک توں غیر ملکی سرپرستی وچ تھیوݨ آلی دہشت گردی دا مکمل خاتمہ کیتا ونڄ سڳے۔ ایں مقصد کیتے پوری قوم سکیورٹی فورسز دے نال کھڑی اے۔