وزیراعظم شہباز شریف نال بل گیٹس دی ملاقات، پولیو مکاوݨ کیتے گیٹس فاؤنڈیشن دی معاونت تے شکریہ ادا کیتا

نیویارک۔23 ستمبر(اے پی پی) وزیراعظم محمد شہباز شریف پولیو مکاوݨ، ماں تے ٻال دی صحت، غذائیت، حفاظتی ٹیکہ جات، ڈیجیٹلائزیشن تے مالیاتی شمولیت دے شعبیں اچ پاکستان دے نال گیٹس فاؤنڈیشن دے تعاون دی تعریف کیتی ۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف نال گیٹس فاؤنڈیشن دے چیئرمین بل گیٹس اتھاں ملاقات کیتی۔ وزیراعظم اڄوکے مہینے دے شروع اچ گیٹس فاؤنڈیشن دی ٹیم دے دورۂ پاکستان دا ذکر کریندے پولیو مکاوݨ ، ماء تے ٻال دی صحت، غذائیت، حفاظتی ٹیکہ جات، ڈیجیٹلائزیشن تے مالیاتی شمولیت دے شعبیں اچ پاکستان دے نال فاؤنڈیشن دے تعاون دی تعریف کیتی ۔ وزیراعظم پاکستان توں پولیو دے مکاوݨ کیتے حکومت دے غیر متزلزل عزم دا اعادہ کیتا۔ انہاں ایں اہم مقصد کیتے گیٹس فاؤنڈیشن دی طویل عرصے توں جاری معاونت تے شکریہ ادا کریندے پولیو دے منڈھوں خاتمے کیتے اپݨے ذاتی عزم دا وی اظہار کیتا۔ بل گیٹس وزیراعظم دی قیادت اچ پاکستان دی پولیو مکاوݨ کیتے جاری کوششاں دی تعریف کریندے آکھیے جو آندی نسلاں کوں ایں موذی مرض توں محفوظ رکھݨ کیتے پولیو دا مکمل خاتمہ اہم اے۔ انہاں ملک اچ پولیو ویکسی نیشن پروگرام تے صوبائی حکومتاں کوں وزیراعظم دی طرفوں ݙتی ڳئی ذاتی رہنمائی دی وی تعریف کیتی۔ وزیراعظم پاکستان دی سماجی تے اقتصادی ترقی اچ گیٹس فاؤنڈیشن دے قابلِ اعتماد شراکت داری دے کردار دی تعریف کریندے صحتِ عامہ، زراعت، ڈیجیٹل جدت تے مصنوعی ذہانت سودھے مختلف شعبیں اچ تعاون کوں مزید وسعت ݙیوݨ اچ دلچسپی دا اظہار کیتا۔ وزیراعظم بل گیٹس کوں حکومت دی طرفوں زرعی شعبے اچ کیتیاں ونڄݨ آلیاں اصلاحات دا ݙسائے ، جنہاں اچ جدت، بائیوٹیکنالوجی، موسمیاتی تبدیلیاں نال مطابقت پیدا کرݨ دی صلاحیت، تحقیق تے کساناں دی استعدادِ کار اچ ودھارے تے خصوصی توجہ ݙتی ویندی پئی اے۔ ݙوہیں رہنماواں بہتر بجاں دی تیاری، مویشیاں دی جینیاتی بہتری تے ابھردی زرعی ٹیکنالوجیز دی ترقی دے شعبیں اچ تعاون دے امکانات تلاش کرݨ تے اتفاق کیتا۔ ملاقات اچ پاکستان دی پائیدار ترقی، تکنیکی پیش رفت تے سماجی شعبیں اچ بہتری کیتے شراکت داری کوں مزید مضبوط تے وسعت ݙیوݨ دے عزم دا اعادہ کیتا ڳیا۔ وزیراعظم ملاقات اچ بل گیٹس کوں وقتی پاکستان دا دورہ کرݨ دی دعوت وی ݙتی