وفاقی وزیر تجارت جام کمال خان نال چینی سفیر دی ملاقات، زرعی تجارت تے معاشی تعاون ودھاوݨ تے اتفاق

اسلام آباد۔ 21 جنوری (اے پی پی) وفاقی وزیر تجارت جام کمال خان نال چین دے سفیر جیانگ ژائی ڈونگ ملاقات کیتی۔ ا ملاقات “پاک چین زرعی سرمایہ کاری کانفرنس” دے موقع تے تھئی۔ ݙوہیں ملکاں معاشی رابطیاں کوں مضبوط بݨاوݨ کوں آپݨی ترجیح قرار ݙتا۔ جام کمال خان آکھیا جو پاکستان برآمدات ودھاوݨ کیتے “حکومت توں حکومت” (G2G) تے “کاروبار توں کاروبار” (B2B) رابطیاں کوں استعمال کریندا پئے  تانجو اقتصادی شراکت داری ٻئی گوڑی تھیوے۔ ملاقات اچ زرعی مصنوعات دی تجارت ودھاوݨ دے موقعیاں تے غور کیتا ڳیا۔ چینی سفیر مضبوط زرعی تجارت دی اہمیت کوں تسلیم کیتا تے ݙوہیں پاسوں مستقل رابطے تے مکالمے جاری رکھݨ تے اتفاق کیتا ڳیا۔