پالیسی اچ تسلسل تے اصلاحات دا واضح روڈ میپ پاکستان دی معاشی حکمتِ عملی دے بنیادی ستون ہن، وفاقی وزیر خزانہ محمد اورنگزیب

ڈیووس۔ 21 جنوری (اے پی پی) وفاقی وزیر خزانہ سینیٹر محمد اورنگزیب آکھیے جو پالیسی اچ تسلسل تے اصلاحات دا واضح روڈ میپ پاکستان دی معاشی حکمتِ عملی دے بنیادی ستون ہن، حکومت ڈیجیٹل ایکوسسٹم کوں مضبوط بݨاوݨ کیتے سرگرمی نال کم کریندی پئی اے۔ انھاں اے ڳالھ ڈیووس اچ ادائیگیوں دی بین الاقوامی کمپنی “ویزا” دے گروپ صدر اولیور جینکن نال ملاقات اچ آکھی۔ ملاقات اچ ڈیجیٹل ادائیگیوں تے مالیاتی جدت دے ذریعے پاکستان دی معیشت کوں جدید بݨاوݨ تے ڳالھ مہاڑ کیتی ڳئی۔ اولیور جینکن پاکستان کیتے ویزا دے لمبی مدت دے عزم دی توثیق کیتی اتے آکھیے جو کمپنی ملک دی ترقی اچ تعاون کیتے بھرپور دلچسپی رکھیندی اے۔ وزیر خزانہ ویزا دی شمولیت کوں خوش آئند قرار ݙتا اتے آکھیے جو حکومت رابطہ کاری اتے ریگولیٹری فریم ورک کوں بہتر بݨاوݨ کیتے کم کریندی پئی اے تانجو نجی شعبے کوں فروغ ملے پیا۔ انھاں معیشت اچ شفافیت تے ڈیجیٹائزیشن کیتے جاری کوششاں تے وی روشنی پاتی۔ ݙوہیں پاسوں ایں ڳالھ تے اتفاق کیتا ڳیا جو ڈیجیٹل فنانس دے ارتقاء کیتے آپت دا قریبی رابطہ ٻہوں ضروری اے۔اولیور جینکن ایں ڳالھ تے زور ݙتا جو ویزا وانڳوں عالمی پلیٹ فارمز سکیورٹی دے اعلیٰ معیار، مضبوطی تے مسئلیاں دے حل کوں تیزی نال ہر پاسے نافذ کرݨ دی صلاحیت دے ذریعے اہم قدر فراہم کریندن۔ انھاں حکومتاں، ریگولیٹرز تے نجی شعبے دے شراکت داراں وچال متوازن تے صحت مندانہ تعاون دی اہمیت تے زور ݙتا تے آکھیا جو مالیاتی ٹیکنالوجیز دے ودھݨ دے نال ویزا عالمی نقطہ نظر تے بہترین عملی تجربات ونڈݨ کیتے تیار اے۔ انھاں آکھیا جو سیاحت اچ اضافے تے سرحد پار سرگرمیاں ودھݨ نال پاکستان اچ بین الاقوامی ادائیگیاں دے حل کوں ٻئی تقویت ملسی۔ ݙوہیں پاسوں ایں ڳالھ تے اتفاق کیتا ڳیا جو عالمی تے مقامی سطح تے ڈیجیٹل فنانس دے مسلسل ارتقاء دے تناظر اچ قریبی رابطہ برقرار رکھݨ ٻہوں ضروری اے، تے ایں اعتماد دا اظہار کیتا جو اے مسلسل تعاون آندے سالاں اچ عملی تے مارکیٹ کیتے تیار حل سامݨے گھن آوݨ اچ مددگار ثابت تھیسی۔ اولیور جینکن پاکستان اچ سرمایہ کاری دے تسلسل کیتے ویزا دے عزم کوں دہرایا تے کمپنی کوں متعلقہ پالیسی تے اصلاحاتی اقدامات اچ ہک قابلِ اعتماد شراکت دار دے طور تے شامل کرݨ دی درخواست کیتی۔