پاکستان زراعت، صنعت، کان کنی، اے آئی اتے آئی ٹی دے شعبیاں اچ تیزی نال اݙاری مارݨ آلا اے، وزیراعظم محمد شہباز شریف

ڈیووس۔ 21 جنوری(اے پی پی) وزیراعظم محمد شہباز شریف برآمدات تے مبنی ترقی حاصل کرݨ اتے سماجی اشاریاں کوں مسلسل کوششاں نال بہتر بݨاوݨ تے زور ݙیندے آکھیے جو پاکستان زراعت، صنعت، کان کنی، اے آئی اتے آئی ٹی دے شعبیاں اچ تیزی نال اݙاری مارݨ آلا اے، حکومت مکمل شفافیت نال اڳو تے ودھدی پئی اے، سیاسی اتے عسکری قیادت وچال مکمل ہم آہنگی اے، ملکی نظام اچ بنیادی تبدیلیاں کیتیاں ڳئن اتے ریونیو کٹھا کرݨ دے نظام کوں مکمل ڈیجیٹل کیتا ویندا پئے۔ وزیراعظم آکھیے جو مہنگائی دی شرح 30 فیصد توں گھٹ تھی تے 5.5 فیصد تھی ڳئی اے، پالیسی ریٹ 22.5 فیصد توں گھٹ تھی تے 10.5 فیصد تھی ڳئے اتے جی ڈی پی دے تناسب نال ٹیکس وصولی دی شرح 10.5 فیصد تھی ڳئی اے۔ انھاں آکھیے جو چین نال اساݙے مضبوط معاشی رشتے ہین اتے ہݨ اساں امریکہ نال وی تعلقات بہتر بݨائن۔ کان کنی اتے معدنیات دی ترقی کیتے امریکیا تے چینی کمپنیاں نال معاہدے کیتے ڳئن۔ انہاں آکھیا جو پچھلے کڄھ سالاں اچ آئی ٹی برآمدات اچ نمایاں بہتری آئی اے اتے نوجوان نسل کوں ہنرمند بݨاوݨ کیتے کئی پروگرام شروع کیتے ڳئن۔ پی آئی اے دی شفاف نجکاری دے بعد ہݨ ٻئے اداریاں دی نجکاری کیتی ویسی۔ انھاں آکھیے جیکر اساں محنت اتے اتحاد نال کم کریندے رہے تاں ٻہوں تیکھے اپݨی منزل تے پڄ ویسوں۔ انہاں اے ڳالھ عالمی اقتصادی فورم دے سالانہ اجلاس دے موقع تے “پاکستان بریک فاسٹ” دی تقریب نال خطاب کریندے آکھی۔ وزیراعظم آکھیے جو پاکستان ہݨ کامیابی دے احساس نال اڳوں ودھدا پئے، اساݙے معاشی اشارے تسلی بخش ہین۔ انھاں ݙسایا جو آئی ٹی برآمدات سالانہ 3 ارب ڈالر تئیں پڄ ڳن۔ نوجواناں بارے ڳالھ کریندے ہوئیں انھاں آکھیے جو نیوٹیک ڄھیں ادارے نوجواناں کوں عالمی معیار دی تربیت ݙیندے پئن جیندے نال انھاں کوں خلیجی ملکاں اتے دنیا دے ٻئے حصیاں اچ سوہݨیاں نوکریاں ملدیاں پئن۔ وزیراعظم آکھیے جو پاکستان ہݨ اینجھے مقام تے اے جتھاں زراعت، صنعت اتے ٹیکنالوجی اچ ترقی دی اݙاری مارݨ کوں تیار اے۔ انھاں آکھیے جو پی آئی اے دی نجکاری پوری دنیا کوں براہِ راست ݙکھائی ڳئی ہئی تاں جو شفافیت تے کوئی سوال نہ اٹھے، ہݨ ہوائی اݙیاں دی آؤٹ سورسنگ اتے بجلی دیاں کمپنیاں دی نجکاری وی کیتی ویسی۔ انھاں ݙسایا جو آئی ایم ایف ہݨ پاکستان دی کامیابی کوں ٻئے ملکاں کیتے ہک مثال دے طور تے پیش کریندا پئے۔ عام آدمی کوں ریلیف ݙیوݨ کیتے انھاں آکھیے جو یوٹیلٹی سٹورز، پاسکو اتے پی ڈبلیو ڈی وانڳوں خسارے والے ادارے بند کر ݙتے ڳئن تاں جو غریب عوام دے ارباں روپے ضائع نہ تھیون۔ انھاں آکھیے جو اے سب کڄھ سیاسی اتے عسکری قیادت دے ہک پیج تے ہووݨ دی وجہ توں ممکن تھئے۔ وزیراعظم عزم دوہرایا جو 24 کروڑ آبادی والے ایں ملک دے نوجواناں کوں ہر موقع ݙتا ویسی تاں جو پاکستان ہک عظیم ملک بݨ سڳے، ایں راہ اچ اوکھ ݙاݙھے ہین ٻھل ساکوں محنت نال منزل مل ہی ویسی۔