ایسوسی ایٹڈ پریس آف پاکستان تے بلغاریہ دی نیوز ایجنسی بی ٹی اے وچال خبراں دے تبادلے تے قریبی رابطیاں دے فروغ کیتے مفاہمت دی یادداشت تے دستخط

اسلام آباد۔ 22 جنوری (اے پی پی) ایسوسی ایٹڈ پریس آف پاکستان (اے پی پی) تے بلغاریہ دی نیوز ایجنسی (بی ٹی اے) خبراں دے تبادلے تے قریبی ادارہ جاتی رابطیاں کوں ودھاوݨ کیتے مفاہمت دی ہک یادداشت تے دستخط کیتن۔ ایں معاہدے دا مقصد ݙوہیں ملکاں وچال معلومات دے بہاؤ کوں یقینی بݨاوݨ اے تے قارئین کوں ݙوہیں پاسوں معتبر خبراں تئیں براہِ راست رسائی حاصل کرݨ اچ مدد کرݨ اے۔ اے پی پی دے منیجنگ ڈائریکٹر محمد عاصم کھچی تے بی ٹی اے دے ڈائریکٹر جنرل کریل والچیو ایم او یو تے دستخط کیتے۔ سیکرٹری اطلاعات تے نشریات اشفاق خلیل تے بلغاریہ دی سفیر ارینا گانچیوا دی موجودگی اچ ایم او یو تے دستخط کیتے ڳئے۔ اے معاہدہ ݙوہیں قومی خبر رساں اداریاں وچال تعاون دا فریم ورک فراہم کریندے پئے۔ ایم او یو دے تحت، اے پی پی تے بی ٹی اے باقاعدگی نال خبراں دے مواد، تصویراں تے ادارہ جاتی تعاون دا اشتراک کریسن۔ تقریب دا آغاز تلاوتِ کلام پاک نال تھیا جیندے بعد خبراں دی ترسیل اچ اے پی پی دے کردار کوں اجاگر کرݨ دے حوالے نال ڈاکومنٹری ݙکھائی ڳئی۔ ایں موقع تے مہمانِ خصوصی سیکرٹری اطلاعات اشفاق خلیل آکھیا جو پاکستان تے بلغاریہ وچال باہمی احترام تے تعاون تے مبنی دوستانہ تعلقات ہن۔ انھاں آکھیا جو اے پی پی تے بی ٹی اے دے درمیان مفاہمت دی یادداشت تے دستخط ݙو پاسہ تعلقات، خاص طور تے میڈیا دے شعبے اچ ہک اہم پیشرفت اے ۔ اے ایم او یو ݙوہیں ریاستی خبر رساں ایجنسیاں وچال تعاون کیتے ہک واضح فریم ورک فراہم کریسی۔ انھاں ایں اعتماد دا اظہار کیتا جو اے معاہدہ پاکستان تے بلغاریہ وچال تعاون تے تعلقات کوں ٻیا مضبوط کرݨ دی راہواں کھولیسی۔ ایم ڈی اے پی پی محمد عاصم کھچی بلغاریہ دے مہماناں کوں جی آیاں کوں آکھیا تے آکھیا جو مفاہمت دی یادداشت تے دستخط پاکستان تے بلغاریہ دے درمیان میڈیا تعاون دے ہک نویں دور دی نشاندہی کریندے ۔ ایندے نال ݙوہیں ملکاں دے درمیان تعلقات کوں ٻیا مضبوط کرݨ دی عکاسی تھیندی اے ۔ انھاں آکھیا جو اے پی پی تے بی ٹی اے دا سانجھا مقصد آپݨے قارئین کوں درست تے ویلھے تے معلومات فراہم کرݨ اے۔ ایں ایم او یو دے ذریعے ݙوہیں نیوز ایجنسیاں آپݨی کوریج کوں وسیع کرݨ کیتے وسائل، تجربے تے مواد دا اشتراک کر سڳسن۔

ایم ڈی محمد عاصم کھچی آکھیا جو حکومتِ پاکستان ٻئے ملکاں نال میڈیا تعاون کوں ودھاوݨ دے اقدامات دی بھرپور حمایت کریندی اے۔ انھاں ݙوہیں ایجنسیاں وچال تعلقات کوں مضبوط بݨاوݨ اچ بلغاریہ دے کردار دی تعریف کیتی اتے امید ظاہر کیتی جو اے معاہدہ خبراں دے اشتراک تے ادارہ جاتی رابطہ کاری اچ عملی نتیجے پیدا کریسی۔ انھاں بلغاریہ دے شرکاء کوں اے پی پی دے مکمل تعاون دا یقین ݙوایا اتے آکھیا جو تقریب اچ بلغاریہ دے سینئر حکام دی موجودگی ݙوہیں ملکاں دے آپسی تعلقات دی اہمیت دی عکاسی کریندی پئی۔ ڈائریکٹر جنرل کریل والچیو آپݨے خطاب اچ آکھیا جو مفاہمت نامے تے دستخط، وعدیاں کوں عملی جامہ پہناوݨ دے پاسے ہک عملی قدم اے پیا۔ الفاظ عمل دے ذریعے ای معنی حاصل کریندن۔ انھاں آکھیا جو اے معاہدہ ݙوہیں ایجنسیاں دے درمیان روزانہ خبراں دے تبادلے کوں یقینی بݨا تے تعاون کوں اہمیت ݙیسی۔ کریل والچیو آکھیا جو مفاہمت نامے دے تحت، بی ٹی اے تے اے پی پی آپݨے پلیٹ فارم تے ہک ٻئے دی خبراں تے ٻئے مواد کوں جگہ فراہم کریسن۔ انھاں آکھیا جو بی ٹی اے پاکستان توں اے پی پی دی منتخب خبراں شائع کریسی، ایں طرح اے پی پی بلغاریہ دے بارے بی ٹی اے دی خبراں گھن سڳسی۔ انھاں ٻیا آکھیا جو ایں انتظام نال ݙوہیں ملکاں دے قارئین، کاروبار نال وابستہ لوکاں، سیاحاں تے محققین کوں مدد ملسی تے او قابلِ اعتماد معلومات حاصل کر سڳسن۔ انھاں آکھیا جو گزشتہ سال پاکستان تے بلغاریہ دے سفارتی تعلقات دے 60 سال پورے تھئن۔ اے پی پی تے بی ٹی اے وچال اے آپݨی نوعیت دا ݙوجھا معاہدہ اے پیا۔ انھاں آکھیا جو ݙوہیں نیوز ایجنسیاں وچال تعاون دا پہلا معاہدہ بی ٹی اے دے بݨݨ دے ݙو سال بعد مارچ 1967 اچ تھیا ہئی۔ انھاں آکھیا جو بی ٹی اے آرکائیوز ایں پراݨے تعاون دے ریکارڈ کوں محفوظ کیتا ہوئے۔ کریل والچیو آکھیا جو بی ٹی اے دے ایں ویلھے 50 قومی خبر رساں ایجنسیاں نال تعاون دے معاہدے ہن، جنھاں اچ ایشیا توں وی وݙی تعداد شامل اے۔ انھاں آکھیا جو اے پی پی تے بی ٹی اے اچ کئی مماثلتاں ہن جنھاں اچ انھاں دی نویں ریاستاں دی آزادی دے بعد انھاں دا قیام وی شامل اے۔ بلغاریہ دی سفیر ارینا گانچیوا آکھیا جو ایم او یو تے دستخط ہک اہم تے با معنی لمحہ اے پیا، جیہڑا ݙوہیں ملکاں کوں ڳالھ مہاڑ تے تعاون دے ذریعے نیڑے گھن آئے۔ انھاں آکھیا جو اڄوکی عالمی ماحول اچ معتبر تے پیشہ ور میڈیا دا اہم کردار اے ، جتھاں معلومات تیزی نال سرحداں دے پار منتقل تھیندن۔ انھاں آکھیا جو ریاستی خبر رساں ایجنسیاں ہک ایجھے ویلھے اچ ہک اہم ذمہ داری نبھیندیاں پئن جݙݨ معاشریاں کوں غلط معلومات تے غیر تصدیق شدہ مواد نال جڑے چیلنجز دا سامݨا اے۔ انھاں ٻیا آکھیا جو بی ٹی اے تے اے پی پی وچال معاہدہ رسمی انتظامات توں اڳوں دا مرحلہ اے پیا تے قابلِ اعتماد معلومات تے پیشہ ورانہ معیار دے تبادلے دے ذریعے قریبی تعاون دے پاسے ہک قدم دی نمائندگی کریندے ۔ معزز سفیر آکھیا جو میڈیا دا تعاون عوام دے عوام نال رابطے اچ وی مددگار ثابت تھیسی اتے ثقافت، تعلیم، معیشت، سائنس تے سیاحت وانڳوں شعبیاں اچ موقعیاں کوں اجاگر کر سڳدے۔ انھاں آکھیا جو اے دستخط ہک اہم موقع تے تھئن کیونجو پاکستان تے بلغاریہ گزشتہ سال سفارتی تعلقات دی چھی دہائیاں پوریاں کیتن۔ انھاں آکھیا جو ݙوہیں ملکاں گزرے ہوئے سالاں اچ احترام تے تعاون دی بنیاد تے تعلقات قائم کیتن۔ تقریب دا اختتام ݙوہیں پاسوں ایں عزم تے اعتماد دے اظہار نال تھیا جو ترتیب وار خبراں دے تبادلے نال پاکستان تے بلغاریہ دے عوام دے درمیان آگاہی تے افہام و تفہیم اچ بہتری آسی۔ تقریب اچ پاکستان دی وزارتِ اطلاعات دے سینئر حکام، سینئر صحافیاں، سفارتکاراں تے ݙوہیں نیوز ایجنسیاں دے نمائندیاں شرکت کیتی۔