وفاقی وزیر منصوبہ بندی احسن اقبال دی زیرِ صدارت اسٹیئرنگ کمیٹی دا نواں اجلاس

اسلام آباد۔ 19 فروری (اے پی پی) وفاقی وزیر منصوبہ بندی، ترقی و خصوصی اقدامات احسن اقبال دی زیرِ صدارت سماجی و سیاسی دائرہ کار تے ایپکس کمیٹی دی اسٹیئرنگ کمیٹی دا نواں اجلاس تھئے۔ اجلاس وچ صوبائی وزرائے خزانہ، چیئرمین پلاننگ اینڈ ڈویلپمنٹ بورڈز، ایڈیشنل چیف سیکرٹریز، سیکرٹری پلاننگ، سیکرٹری فنانس تے متعلقہ اداریں دے اعلیٰ حکام شرکت کیتی ۔ ایں کمیٹی دا قیام بہتر گورننس تے ترقیاتی منصوبیں وچ برابری دے ذریعے انتہا پسندی کوں ختم کرݨ کیتے کیتا گئے۔اجلاس وچ اہم فیصلہ کیتا گئے جو تعلیمی اداریں دی رجسٹریشن کیتے ہکو جیہا  قانون بݨایا ونڄے۔ احسن اقبال آکھیے جو کہیں وی قسم دے تعلیمی ادارے ہوون، بھاویں او پرائیویٹ سکول ہوون، مدرسے ہوون یا سرکاری سکول، ساریں کیتے ہک یونیورسل قانون ہووݨاں چاہیدے تاں جو کہیں نال امتیازی سلوک نہ تھیوے۔ انھاں آکھیا جو مدرسے وی تعلیمی ادارے ہن، انھاں کوں انج رکھݨ دی وجہ توں شک پیدا تھیندے، انھاں کوں قومی دھارے وچ شامل کرݨاں اے۔ وفاقی وزیر دی ہدایت تے مدارس، سکولاں تے ٹیکنیکل اداریں دی رجسٹریشن کیتے ہک مشترکہ فریم ورک بݨایا ویسی۔ وفاقی وزیر ہدایت کیتی اے جو وفاق المدارس دے نمائندیں دا اجلاس سݙیا ونڄے تاں جو انھاں کوں ترقیاتی ایجنڈے وچ شامل کیتا ونڄے۔اجلاس وچ ݙسایا گیا جو ہاسٹلاں وچ طلبہ کوں صوبائی یا لسانی بنیاداں تے کمرے الاٹ کرݨ بند کرݙتے گئن تاں جو قومی یکجہتی کوں ودھارا ملے۔ کمیٹی صوبیں کوں ملک دے 20 پسماندہ ترین ضلعیں دی ترقی کیتے جامع حکمتِ عملی بݨاوݨ دی ہدایت کیتی اے۔ احسن اقبال آکھیے جو وفاق صوبیں کوں فنڈز ݙیندا پئے، ہݨ صوبیں دی ذمہ واری اے جو او پسماندہ ضلعیں کوں ترجیح ڈیون۔ سارے صوبے پسماندہ ضلعیں دی ترقی دا پنج سالہ پلان ݙو مہینے وچ پیش کریسن۔ کمیٹی ہدایت کیتی اے جو عوامی رابطے کوں مضبوط کیتا ونڄے تے نصاب وچ علامہ اقبال دی تعلیمات کوں شامل کیتا ونڄے۔