کہیں وی سیاسی رہنما کوں ملݨ آلا ریلیف عدالتاں دے ذریعے ہی ممکن اے، وفاقی وزیر قیصر احمد شیخ

چنیوٹ۔ 20 فروری (اے پی پی) وفاقی وزیر سرمایہ کاری بورڈ قیصر احمد شیخ اپݨی رہائش گاہ تے میڈیا نال ڳالھ مہاڑ کریندے آکھیے جو کہیں وی سیاسی رہنما کوں ملݨ آلا ریلیف عدالتاں دے ذریعے ہی ممکن اے کیوں جو متعلقہ کیس عدالتاں وچ چلدے پئن تے ہݨ تئیں جیڑھے وی فیصلے آئن او عدالتی عمل دے تحت آئن۔ ایں عمل وچ حکومت دا براہِ راست کوئی کردار کائنی ہوندا۔ انھاں آکھیا جو بانی پی ٹی آئی دی صحت دے حوالے نال مکمل تے تسلی بخش طبی سہولتاں ݙتیاں ویندیاں پئن، ماہر تے مستند ڈاکٹر باقاعدگی نال معائنہ کریندے پئن تے علاج دے سارے تقاضے پورے کیتے ویندے پئن۔ انھاں دعا کیتی جو اللہ تعالیٰ انھاں کوں صحتِ کاملہ عطا فرماوے۔ وفاقی وزیر آکھیا جو خیبر پختونخوا وچ ݙتے ڳئے دھرنے دے حوالے نال پشاور ہائی کورٹ وی دھرنا ختم کرݨ دی ہدایت جاری کیتی، جیندے بعد احتجاج ختم کر ݙتا ڳیا۔ انھاں آکھیا جو احتجاج تے دھرنیں دی سیاست نال ملک کوں فیدہ کائنی بلکہ ضیان تھیندے، احتجاج دی سیاست نال ملک اڳوں نی ودھ سڳدا، ساریاں سیاسی قوتاں کوں چاہیدے جو او ذاتی مفاد توں اُتے تھی تے قومی مفاد وچ کٹھے ٻہن تاں جو پاکستان ترقی دے رستے تے ٹر سڳے۔