افغان عبوری حکومت آپݨی سرزمین پاکستان دے خلاف دہشت گردی کیتے استعمال تھیوݨ توں روکے، وزارتِ اطلاعات

اسلام آباد۔ 22 فروری (اے پی پی) پاکستان اچ اڄوکے خودکش بم دھماکیاں دے واقعات بشمول اسلام آباد دی امام بارگاہ، باجوڑ، بنوں تے ولا دوبارہ بنوں اچ رمضان دے مقدس مہینے دے دوران ہک ٻئے واقعے دے بعد پاکستان دے کول ایں گالھ دے پکے ثبوت موجود ہن جو دہشت گردی دی اے کارروائیاں خوارج آپݨی افغانستان اچ موجود قیادت تے ہینڈلرز دے آکھݨ تے کیتن ۔ وزارتِ اطلاعات تے نشریات دے بیان دے مطابق انھاں حملیاں دی ذمہ داری افغانستان اچ موجود پاکستانی طالبان جنھاں دا تعلق فتنہ الخوارج (ایف اے کے) تے انھاں نال جڑیاں تنظیماں تے دولتِ اسلامیہ صوبہ خراسان (آئی ایس کے پی) نال اے، انھاں وی قبول کیتی اے۔ پاکستان ولوں ولا ولا افغان طالبان حکومت تے زور ݙیوݨ دے باوجود جو او افغان سرزمین دے استعمال کوں روکݨ کیتے واضح اقدامات کرے، افغانستان اچ موجود دہشت گرد گروہ تے غیر ملکی پراکسیز پاکستان اچ دہشت گردی دی کارروائیاں کریندن، افغان طالبان حکومت انھاں دے خلاف کوئی ٹھوس کارروائی کرݨ اچ ناکام رہی اے۔ پاکستان ہمیشہ توں خطے اچ امن و استحکام برقرار رکھݨ کیتے کوششاں کریندا ریہے لیکن ایندے نال نال آپݨے شہریاں دی حفاظت تے سلامتی اساݙی پہلی ترجیح اے۔ ایں سب کوں ذہن اچ رکھدے ہوئیں پاکستان جوابی کارروائی اچ پاکستانی طالبان دے ایف اے کے تے ایندے نال جڑیاں تنظیماں تے آئی ایس کے پی دے ست دہشت گرد کیمپاں تے ٹکاݨیاں کوں پاک افغان سرحدی علاقے اچ بالکل صحیح طریقے نال انٹیلی جنس دی بنیاد تے کارروائی اچ نشانہ بݨائے ۔ پاکستان عبوری افغان حکومت توں توقع رکھدے جو او آپݨی ذمہ داریاں پوریاں کرے تے خوارج تے دہشت گرداں ولوں پاکستان دے خلاف آپݨی سرزمین دے استعمال کوں روکے کیونجو پاکستان دے لوکاں دی حفاظت اساݙی پہلی ترجیح اے۔ پاکستان عالمی برادری توں وی توقع رکھیندے جو او طالبان حکومت تے زور ݙے تے مثبت تے تعمیری کردار ادا کرے جو او دوحہ معاہدے دے مطابق افغان سرزمین کوں ڈوجھے ملکاں دے خلاف استعمال کرݨ توں روکݨ کیتے آپݨے وعدیاں تے قائم رہوے جیہڑا علاقائی تے عالمی امن تے سلامتی کیتے ہک اہم قدم اے۔