وزارتِ پارلیمانی امور، پارلیمانی معاملیاں اچ مرکزی کردار ادا کریندی اے، ڈاکٹر طارق فضل چوہدری دا انٹرویو

اسلام آباد۔ 22 فروری (اے پی پی) وفاقی وزیر پارلیمانی امور ڈاکٹر طارق فضل چوہدری آکھیا جو وزارتِ پارلیمانی امور افرادی قوت تے ذیلی محکمیاں دے لحاظ نال سب توں چھوٹی وزارت ہووݨ دے باوجود پارلیمانی امور دی انجام دہی اچ سب توں اہم کردار ادا کریندی اے۔ امریکی صدر ڈونلڈ ٹرمپ وزیراعظم دے حالیہ دورہ امریکہ دے دوران وزیراعظم شہباز شریف تے فیلڈ مارشل سید عاصم منیر دی قائدانہ صلاحیتاں تے شخصیت دے حوالے نال جیہڑی تعریف کیتی اے، دنیا کوں پاکستان دے حوالے نال ہک مثبت سنیھا ڳئے۔ وزیراعظم وزارتِ پارلیمانی امور دی کارکردگی کوں خاص طور تے سراہیا۔جمعے کوں اے پی پی کوں خاص انٹرویو ݙیندیں ہوئیاں انھاں آکھیا جو وزارتِ پارلیمانی امور دا عملہ ٻیاں وزارتاں دے مقابلے اچ سب توں ڳھٹ اے مگر اے ساری وزارتاں توں ودھ اہمیت رکھݨ آلی وزارت اے، پارلیمنٹ دا تمام بزنس ایں وزارت دے ذریعے ہوندے۔ انھاں آکھیا اے جو قومی اسمبلی تے سینیٹ دے اجلاسں دے دوران ساری وزارتاں دی نمائندگی وی ایوان اچ وزارتِ پارلیمانی امور کریندی اے۔ قانون سازی اچ پارلیمانی امور دا کردار کلیدی ہوندے اتے وزارتِ قانون دے نال رَل تے اساں اے سارے کم کریندوں۔ انھاں آکھیا اے جو تمام حکومتی بلز وزارتِ پارلیمانی امور گھن آندی اے، سینیٹ تے قومی اسمبلی دے آرڈر آف دی ڈیز وی ایں وزارت دے ذریعے ای آندن ۔ ہک سال مکمل تھیوݨ تے اساں کارکردگی دے حوالے نال ہک پیپر وی شائع کیتے جیندے اچ وزارتِ پارلیمانی امور دی کارکردگی دا تفصیلی ذکر کیتا ڳئے۔ انھاں آکھیا اے جو ساری وزارتاں دے پارلیمان نال جڑے سوالات، توجہ مبذول نوٹسز تے ٻئے سارے معاملے ایوان اچ پارلیمانی امور دی وزارت دے ذریعے پورے کیتے ویندن ۔ ہک سوال دے جواب اچ انھاں آکھیا جو کابینہ اچ تبدیلی دا فیصلہ وزیراعظم کریندن، شہباز شریف ہک بہترین کپتان وانڳوں چنگا کم کرݨ آلے کوں شاباش ڈیندن تے کم نہ کرݨ آلیاں دی باز پرس وی ہوندی اے۔ انھاں آکھیا اے جو کارکردگی دا جائزہ گھن تے کابینہ اچ تبدیلی دا فیصلہ وزیراعظم کریسن۔ ہک ٻئے سوال دے جواب اچ انھاں آکھیا اے جو قومی اسمبلی دی 10 قائمہ کمیٹیاں دے چیئرمین تحریک انصاف توں ہن ۔ ہر کمیٹی اچ انھاں دے چار توں پنج ممبر موجود ہن، تاہم جنھاں 10 کمیٹیاں دے چیئرمین تحریک انصاف توں ہن، انھاں دے استعفیاں دے بعد پبلک اکاؤنٹس کمیٹی سودھے انھاں دا کم رک ڳئیا ہئی ۔ میں سپیکر کوں اے مشورہ ݙتا ہئی جو اساں انھاں کمیٹیاں دے اجلاس سݙݨ کیتے ریکوزیشن کر سگدوں۔ جیندے بعد کمیٹیاں ریکوزیشن دے ذریعے آپݨا کم نبھاوݨ شروع کر ݙتے۔ انھاں آکھیا اے جو پبلک اکاؤنٹس کمیٹی دے اجلاس وی ریکوزیشن دے ذریعے باقاعدگی نال تھیندے پئن۔گورننس دے حوالے نال انھاں آکھیا اے جو اساں اوکھے حالات اچ حکومت سنبھالی ہئی ۔ تحریک انصاف دی خواہش ہئی جو ملک دیوالیہ تھی ون٘ڄے اتے لوک تاڑیاں مارن ۔ انھاں آکھیا اے جو اج ملک دے معاشی اشارے بہتر تھیندے پئن، غیر ملکی سرمایہ کاری آندی پئی اے، معاشی استحکام آندا پئے تے غیر ملکی زرِ مبادلہ اچ ریکارڈ ودھارا تھیے۔ اساݙی کوشش اے جو زراعت، معیشت، موسمیاتی تبدیلیاں تے آئی ٹی دے شعبیاں اچ کم دی رفتار تکھی کیتی ون٘ڄے ۔ اساں اتحادی جماعتاں دے شکر گزار ہیسے جنھاں دے تعاون نال اساں کامیابی آلے پاسے ویندے پئیوں۔ انھاں آکھیا اے جو اساکوں دہشت گردی دا سامݨا اے جیہڑا ہک چیلنج اے، ایندے خاتمے کیتے پوری کوشش کیتی ویندی پئی اے۔ بھارت دے خلاف آپریشن بنیان المرصوص اچ بے مثال کامیابی دے بعد عالمِ اسلام سمیت پوری دنیا پاکستان کوں ہک وکھرے نظریے نال ݙیکھدی پئی اے۔ انھاں آکھیا اے جو ایندی سب توں وݙی مثال صدر ٹرمپ ولوں وزیراعظم شہباز شریف تے فیلڈ مارشل سید عاصم منیر دی تعریف اے۔ ایندے نال دنیا کوں مثبت سنیھا ڳئے جو پاکستان کیویں ابھردا پئے ۔ انشاء اللہ ملک ٻیا ترقی کریسی۔